‘कोपर्डी’ अत्याचार : कट रचून खून केल्याचा आरोप निश्चित

कोपर्डी खटल्यातील तीनही आरोपींनी कट रचून अल्पवयीन मुलीवर अत्याचार करून तिची हत्या केल्याचे सकृतदर्शनी पुराव्यातून स्पष्ट होत आहे.

अहमदनगर : कोपर्डी खटल्यातील तीनही आरोपींनी कट रचून अल्पवयीन मुलीवर अत्याचार करून तिची हत्या केल्याचे सकृतदर्शनी पुराव्यातून स्पष्ट होत आहे. त्यामुळे आरोपींवर कट, अत्याचार व खुनाचा आरोप ठेवण्यात यावा, असा युक्तिवाद सरकारी पक्षातर्फे न्यायालयासमोर करण्यात आला़ घटनेच्या चार दिवस आधी तीनही आरोपींनी पीडित मुलीची छेड काढली होती़ मुलीने विरोध केल्याने, आरोपींनी कट रचून हे कृत्य केल्याचे विशेष सरकारी वकील अ‍ॅड़ उज्ज्वल निकम यांनी न्यायालयासमोर सांगितले. जिल्हा सत्र न्यायालयात मंगळवारपासून या खटल्याची सुनावणी सुरू झाली. बुधवारी आरोपींना हजर करण्यात आले होते़ निकम यांनी आरोपींवर दोषारोप निश्चितीसाठी युक्तिवाद केला़ गुरुवारी आरोपींतर्फे त्यांचे वकील योहान मकासरे, प्रकाश आहेर हे युक्तिवाद करणार आहेत़ न्यायालयासमोर दोषारोपाची जंत्री सादर करताना, अ‍ॅड. निकम यांनी प्रथम घटनेची पार्श्वभूमी कथन केली़ कोपर्डीत १३ जुलैच्या अत्यंत संतापजनक घटनेच्या चार दिवस आधी ही मुलगी शाळेतून घरी येत असताना, आरोपी शिंदे याने तिची छेड काढली़ तेव्हा त्याच्यासमवेत भवाळ व भैलुमे उपस्थित होते़ छेडछाडीला विरोध केल्याने, आरोपींनी मुलीला धमकी दिली होती़ त्यानंतर, चार दिवसांतच अत्याचार व हत्येची घटना घडली़ घटनेच्या दिवशी दोन आरोपी घटनास्थळाजवळील रस्त्यावरून दुचाकीवरून फिरत होते़ घटनास्थळापासून मुलीचे कपडे व तिचा मृतदेह लांबवर विरुद्ध दिशेने होता. हे काम एकटा आरोपी करू शकत नाही,असे स्पष्ट होत असल्याचे अ‍ॅड. निकम यांनी सांगितले. गुन्ह्याचा पंचनामा आणि घटनास्थळाचा नकाशा, याकडेही न्यायालयाचे त्यांनी लक्ष वेधले़ कोपर्डी खटल्याची तातडीने सुनावणी घेण्यात यावी, अशी विनंती सरकारी पक्षातर्फे निकम यांनी न्यायालयाकडे केली आहे़ खटल्यात एकूण ७० साक्षीदार तपासण्यात येणार असल्याचे सांगण्यात आले़ (प्रतिनिधी)>जामीन अर्जावर आज सुनावणी आरोपी नितीन भैलुमे याने जामिनासाठी अर्ज केला असून, खटल्यातून मुक्त करण्याची मागणी केली आहे़ त्याबाबत सरकारी पक्ष व आरोपीतर्फे गुरुवारी बाजू मांडण्यात येणार आहे़