ऑनलाइन लोकमत
कोल्हापूर, दि. २८ - कोल्हापूर शहराची हद्दवाढ झालीच पाहिजे या मागणीसाठी हद्दवाढ समर्थक कृती समितीने पुकारलेल्या कोल्हापूर बंदला गुरुवारी चांगला प्रतिसाद मिळाला. बंद दरम्यान चार रिक्षा फोडण्यात आल्या. एका एसटीची तोडफोड झाली. राजारामपुरीत दुकानाची काच जमावाने फोडली. कार्यकर्त्याला धरून नेणाऱ्या पोलिस निरीक्षक अमृत देशमुख यांच्या अंगावर जमाव धावून गेल्याने कांहीकाळ वातावरण तणावपूर्ण बनले.
हद्दवाढ न झाल्यास महापालिकेच्या नगरसेवकांनी राजीनामा द्यावेत असे आवाहन माजी महापौर आर. के. पोवार यांनी केले. कोल्हापूरची अठरा गावांसह हद्दवाढ प्रस्तावित आहे. दोन दिवसांपूर्वी त्याच्या अधिसूचनेवरही मुख्यमंत्री देवेंद्र फडणवीस यांनी सही केली. परंतू त्यांच्याच पक्षाचे आमदार अमल महाडिक, शिवसेनेचे आमदार सर्वश्री चंद्रदिप नरके व डॉ.सुजित मिणचेकर यांनी हद्दवाढीस कडाडून विरोध केल्यामुळे मुख्यमंत्र्यांनी हद्दवाढीची अधिसूचना बुधवारी स्थगित केली. हद्दवाढीस विरोध म्हणून अठरा गावांनीही बंद पाळून सरकारला इशारा दिला आहे. या सगळ््याचा परिणाम म्हणून हद्दवाढीच्या समर्थनार्थ महापौर अश्विनी रामाणे यांनीच बंदचे आवाहन केले होते. त्यास प्रतिसाद म्हणून महापालिकेचे सर्व कर्मचारी काम बंद ठेवून बंदमध्ये सहभागी झाले. नागरी वाहतूकीची महत्वाची व्यवस्था असलेल्या केएमटीची एकही गाडी रस्त्यावर आली नाही. या यंत्रणेचे कर्मचारीही गाड्या कार्यशाळेत लावून मोर्चात सहभागी झाले. त्यामुळे कामानिमित्त बाहेर पडलेल्या लोकांचे कांही प्रमाणात हाल झाले. रिक्षा वाहतूक मात्र कांही प्रमाणात सुरु राहिली. चित्रपटाचा पहिला शो कांहीठिकाणी सुरु राहिला. विद्यार्थी वाहतूक करणाऱ्या रिक्षाचालकांनी बंदमध्ये भाग घेतल्याने शाळांतील उपस्थिती रोडावली. कॉलेज सुरु झाली होती परंतू बंद समर्थक कार्यकर्त्यांनी तिथे जावून कॉलेज बंद करायला भाग पाडले. नेहमी गजबजलेला महाद्वार रोड, शिवाजी चौकचा परिसर, लक्ष्मीपुरी, शाहुपूरी, राजारामपुरी ह्या व्यापारी पेठांतील व्यवहारही दुपारपर्यंत बंदच राहिले. रस्त्यावरील वर्दळही कमी होती. सकाळी बिंदू चौकातून महापौर रामाणे यांच्या नेतृत्वाखाली सर्वपक्षीय कार्यकर्त्यांनी बंदचे आवाहन करत फेरी काढली त्यामध्ये माजी महापौर आर.के.पोवार, उपमहापौर शमा मुल्ला, राष्ट्रवादीचे शहराध्यक्ष राजू लाटकर, भाजपचे नेते महेश जाधव, संदिप देसाई, शिवसेनेचे जयवंत हारुगले, नगरसेवक नियाज खान आदी सहभागी झाले. ही फेरी राजारामपुरीत आली असता बेकरी बंदचे आवाहन करणाऱ्या कार्यकर्त्यास पोलिसांनी पकडले. त्याला सोडण्यात यावे असा तगादा कार्यकर्त्यांनी पोलिस निरीक्षक अमृत देशमुख यांच्याकडे धरला. त्यावरून त्यांच्या अंगावर धावून जाण्याचा प्रकार घडला. कांहीकाळ वातावरण तणावपूर्ण बनले.
पालकमंत्र्यांचे अभिनंदन.. कोल्हापूरची हद्दवाढ व्हावी यासाठी आग्रही असणाऱ्या पालकमंत्री चंद्रकांतदादा पाटील यांचे यावेळी कृती समितीतर्फे अभिनंदन करण्यात आले.
आमदार-माजी आमदारांचा निषेध हद्दवाढीस विरोध केल्याबध्दल आमदार अमल महाडिक, चंद्रदिप नरके व डॉ.सुजित मिणचेकर यांचा कृती समितीने तीव्र शब्दांत निषेध केला. काँग्रेसचे जिल्हाध्यक्ष माजी आमदार पी.एन.पाटील यांचाही हद्दवाढीस विरोध आहे. त्यामुळे त्यांचाही निषेध करण्यात आला. बंदमध्ये आमदार सतेज पाटील यांचे मोजके कार्यकर्ते सहभागी झाले. हद्दवाढीच्या मुद्द्यांवर सर्वच पक्षांत शहरी व ग्रामीण अशी फूट पडल्याचे चित्र तयार झाले आहे.