कडू, कोसंबी यांना साहित्य अकादमी पुरस्कार

मराठी साहित्यासाठीचा यंदाचा साहित्य अकादमीचा बालसाहित्य पुरस्कार ल. म. कडू यांना तर युवा पुरस्कार राहुल कोसंबी यांना गुरुवारी जाहीर झाला

लोकमत न्यूज नेटवर्कमुंबई : मराठी साहित्यासाठीचा यंदाचा साहित्य अकादमीचा बालसाहित्य पुरस्कार ल. म. कडू यांना तर युवा पुरस्कार राहुल कोसंबी यांना गुरुवारी जाहीर झाला.कडू यांना ‘खारीच्या वाटा’ या कादंबरीसाठी तर कोसंबी यांना ‘उभा आडवा’ या निबंधासाठी पुरस्कार मिळाला. ताम्रपत्र व ५० हजार रुपये रोख असे या पुरस्कारांचे स्वरूप असून १४ नोव्हेंबर रोजी दिल्लीत होणाऱ्या कार्यक्रमात ते प्रदान करण्यात येतील. माधुरी पुरंदरे, कविता महाजन व विजया राजाध्यक्ष यांच्या निवड मंडळाने कडू यांची तर आसाराम लोमटे, लक्ष्मण गायकवाड व भालचंद्र मुणगेकर यांच्या निवड मंडळाने कोसंबी यांची निवड केली. कोकणी भाषेतील युवा पुरस्कार अमेय विश्राम नाईक यांना (मोग डॉट कॉम हा काव्यसंग्रह) आणि विन्सी क्वाड्रोस यांना (जादूचे पेतुल कादंबरी) बालसाहित्य पुरस्कार जाहीर झाला आहे. अकादमीचे अध्यक्ष प्रा. विश्वनाथ त्रिपाठी यांच्या अध्यक्षतेखाली झालेल्या कार्यकारी मंडळाच्या गुवाहाटी येथे झालेल्या बैठकीत २४ भाषांमधील साहित्याची बालसाहित्य पुरस्कार व युवा पुरस्कारासाठी निवड करण्यात आली. अकादमीच्या दिल्लीतील मुख्यालयाने पुरस्कार विजेत्यांची नावे जाहीर केली.