‘लोकमत’च्या शुभेच्छांचा जगावेगळा ‘आनंद’

‘मित्रांनो, गेली तीनहून अधिक वर्षे फेसबुकवर वापरतोय. पण आजपर्यंत कधी माझा वाढदिवस मी जाहीर केला नव्हता. कित्येकदा तर रेकॉर्डिंग, तालमीच्या निमित्ताने मुंबईत असायचो.

पुणे-पिंपरी : ‘मित्रांनो, गेली तीनहून अधिक वर्षे फेसबुकवर वापरतोय. पण आजपर्यंत कधी माझा वाढदिवस मी जाहीर केला नव्हता. कित्येकदा तर रेकॉर्डिंग, तालमीच्या निमित्ताने मुंबईत असायचो. त्यामुळे शुभेच्छापत्रे, फोन अगर एसएमएस यांचा वाढदिवशी अभाव असायचा. या वर्षी अनपेक्षित ‘लोकमत’मध्ये माझा फोटो आणि वाढदिवसाच्या अभिनंदनाचा मजकूर प्रसिद्ध झाला आणि माझ्यावर फोन, ईमेल, फेसबुकवर शुभेच्छांचा वर्षाव झाला. प्रसिद्धीसाठी तहानलेल्यांच्या या जगात मी जगावेगळा... तेव्हा या सगळ्याबद्दल मन:पूर्वक धन्यवाद. आणि शक्यतोवर माझी जन्मतारीख येथेच विसरून जा, ही विनंती. तुम्हा सर्वांच्या चिरकाल प्रेमाची साक्ष पटलीये. त्यामुळे दरवर्षी याच्या पुनरावृत्तीची गरजच नसावी. प्रयोगशील संगीतकार आनंद मोडक आज काळाच्या पडद्याआड गेले, आणि त्यांच्या फेसबुकवरील ही त्यांची पोस्ट वाचून सगळ्या कलावंतांना गहीवरून आले. ‘लोकमत’मध्ये वाढदिवस हा स्तंभ दररोज प्रसिद्ध होतो. यामध्ये १३ मे रोजी मोडक यांचा वाढदिवस प्रसिद्ध झाला; आणि या अनपेक्षित अभीष्टचिंतनाने ते भारावून गेले. त्या दिवशीच्या फेसबुक पोस्टमध्ये ते लिहितात, ‘या वर्षी अनपेक्षितपणे ‘लोकमत’मध्ये माझा फोटो व वाढदिवसाच्या अभिनंदनाचा मजकूर प्रसिद्ध झाला आणि माझ्यावर फोन, ईमेल, फेसबुकवर शुभेच्छांचा वर्षाव झाला. खरेतर प्रसिद्धीसाठी तहानलेल्यांच्या या जगात मी जगावेगळा. अनपेक्षित अशा या प्रेमळ भडिमाराने क्षणभर सुखावलो खरा; पण गुदमरलो. इतक्या मंडळींना माझ्याबद्दल वाटणार्‍या कौतुकभरल्या प्रेमाच्या प्रचितीने चकित झालो. हे कधी माझ्या जाणिवेतही नव्हते. किंबहुना मी स्वत:ला कुरूप वेडे पिलू समजत आलोय. त्यामुळे कोणाकडूनही कधी अशा प्रेमाची अपेक्षाच केली नाही. त्यामुळे खरेतर गांगरून जायला झाले. तेव्हा या सगळ्याबद्दल मन:पूर्वक धन्यवाद. आणि शक्यतोवर माझी जन्मतारीख येथेच विसरून जा, ही विनंती. तुम्हा सर्वांच्या चिरकाल प्रेमाची साक्ष पटलीये. त्यामुळे दरवर्षी याच्या पुनरावृत्तीची गरजच नसावी. तुम्हा सर्वांचे पुनश्च हार्दिक आभार आणि अनेकोत्तम शुभेच्छा...’ ‘मराठी संगीतातील सुप्रसिद्ध संगीतकार हरपला. ईश्वर त्यांच्या आत्म्यास शांती देवो, अशी शब्दरूपी श्रद्धांजली स्वरसम्राज्ञी लता मंगेशकर यांनी वाहिली. दिग्दर्शक सचिन कुंडलकर म्हणाले, ‘अतिशय सुंदर अशा चाली, गीते देणारा संगीतकार आपल्यातून हरपला आहे. (प्रतिनिधी)