मनोहर कुंभेजकर/ गौरी टेंबकर,
मुंबई- जोगेश्वरी पूर्व येथील विविध समस्यांचा ऊहापोह करण्यासाठी ‘लोकमत आपल्या दारी’ या कार्यक्रमात शुक्रवारी समस्यांचा पाऊस पडला. ‘लोकमत’ आणि ‘स्वराज लोकसेवा प्रतिष्ठान’ यांच्या संयुक्त विद्यमाने मेघवाडी नाक्याजवळील बालविकास विद्यामंदिर येथे हा कार्यक्रम पार पडला.सुमारे साडेतीन तास चाललेल्या या कार्यकमाला येथील ५०० सर्वधर्मीय नागरिक, विविध गृहनिर्माण संस्थांचे आणि मंडळांचे प्रतिनिधी आणि विशेषकरून महिलावर्ग मोठ्या संख्येने उपस्थित होता. या वेळी मंचावर प्रतिष्ठानच्या अध्यक्षा सुरक्षा घोसाळकर, जोगश्वरी वाहतूक विभागाचे पोलीस उपनिरीक्षक रवींद्र दोडमनी, के(पूर्व) विभागाचे सहायक अभियंता देवेंद्रकुमार जैन यांचे दूत म्हणून घनकचरा विभागाचे सहायक अभियंता तुषार पिंपळे, पालिकेच्या आपत्कालीन विभागाचे अधिकारी राजेंद्र लोखंडे, विकास आराखडा (डीपी) तज्ज्ञ अँड ग्राँडफे पिमेंटा, आरजेएमडी स्कूलचे अध्यक्ष सहदेव सावंत व माजी प्राचार्य डॉ. अपेक्षा खामकर, म्हाडाचे निवृत्त मुख्य अभियंता विजय ठाकरे, अॅड. माधवराव वाघ, माजी वरिष्ठ पोलीस प्रशासकीय अधिकारी, आरे समाजसेवक सुनील कुमरे आदी मान्यवर उपस्थित होते. या वेळी स्वराज लोकसेवा प्रतिष्ठानच्या वतीने मान्यवरांचा तुळशीचे रोप देऊन सत्कार करण्यात आला, तसेच प्रतिष्ठान आणि मुंबई महानगर पालिकेच्या वतीने महिला सक्षमीकरणासाठी विविध व्यवसायाभिमुख अभ्यासक्रम यशस्वीपणे पूर्ण करणाऱ्या महिलांचा प्रशस्तिपत्रक देऊन सत्कार करण्यात आला. या चर्चासत्रात समस्या मांडणाऱ्या मेघा चव्हाण, बंड्या शिंदे, शैलेश नेस्त्रे, राजेंद रेडकर आणि प्रकाश भोसले यांचा यावेळी तुळशी रोप देऊन सत्कार करण्यात आला.>सुरक्षा घोसाळकर यांनी सांगितले की, ‘१९८९ पासून प्रतिष्ठानच्या वतीने महिला, ज्येष्ठ नागरिक आणि तरुणांसाठी अनेक विधायक उपक्रम सातत्याने राबवले जातात. आषाढी एकदशीनिमित्त लोकमतरूपी विठ्ठलाला येथील समस्या सोडवण्याचे आम्ही साकडे घालतो. नागरिक म्हणून आपली जबाबदारी आणि समस्या पालिका प्रशासन, शासन यांच्या समन्वयाने सोडवण्यासाठी ‘लोकमत आपल्या दारी’ या कार्यक्रमाचे आयोजन करण्यात आले आहे. एक महिन्यानंतर येथील किती समस्या सुटल्या, याची आढावा बैठक ‘लोकमत’बरोबर आयोजित करण्यात येणार आहे. मुंबई अग्निशमन दलातर्फे अग्निसुरक्षेचे प्रशिक्षण देण्यात येते. पहिली महिला अग्निशमन स्वयंसेवक म्हणून जसे मी प्रशिक्षण घेतले, तसे जोगेश्वरीकरांनीही घ्यावे,’ >या शिक्षण संस्थेत इयत्ता १ली ते १०वीचे सुमारे ३५०० विद्यार्थी आहेत, परंतु शासनाकडून शाळेला अनुदान वेळेवर मिळत नाही. २०१४ चे अनुदान शासनाने दिले. मात्र, २००४ ते २०१३च्या अनुदानाची थकबाकी शासनाने दिली नाही. मग शाळा चालणार कशा? मराठी माध्यमांच्या शाळा बंद पडत आहेत.- सहदेव सावंत, अध्यक्ष, आरजेएमडी स्कूल, >मुलांवरील अत्याचार वाढत असल्यामुळे मुले सुरक्षित घरी येतील याची खात्री नाही. अत्याचार करणाऱ्यांवर कडक कारवाई करावी. मेघवाडीची मुले सुसाट बाइक चालवतात, त्याला आळा घालावा. मातोश्री संकुल, मजास डेपो, श्यामनगर तलाव, दुर्गानगर, आरे जोडरस्ता, कोकणनगर, सेंट जॉर्डन शाळा येथे मोठ्या प्रमाणात वाहने उभी असतात. येथे रात्रीच्या वेळी अश्लील चाळे चालतात. - मेघा चव्हाण