आंतरजातीय प्रेमविवाह: बहिणीचे कुटुंब ट्रॅक्टरखाली चिरडण्याचा प्रयत्न

पातूर तालुक्यातील घटना; तीन जखमी झालेल्या सवरेपचार रूग्णालयात उपचारासाठी दाखल.

पातूर (जि. अकोला) : बहिणीने आंतरजातीय प्रेमविवाह केल्याचा राग मनात ठेऊन भावाने तिला पती आणि मुलीसह ट्रॅक्टरखाली चिरडण्याचा प्रयत्न केल्याची धक्कादायक घटना कार्ला- अंबाशी मार्गावर शुक्रवारी सायंकाळी ७ वाजता घडली. या अपघातात जखमी झालेल्या तिघांना अकोला येथील सवरेपचार रूग्णालयात उपचारासाठी दाखल करण्यात आले असून, रात्री उशिरापर्यंत याप्रकरणी गुन्हा दाखल करण्याची प्रक्रिया सुरू होती. पातूर तालुक्यातील कार्ला येथील एका युवतीने पाच वर्षांपूर्वी आंतरजातीय प्रेमविवाह केला होता. या विवाहास मुलीच्या घरच्या मंडळींने आधीपासून विरोध केला होता. गावातील मंडळींचा दबाव आणि धमक्यांना घाबरून युवती पतीसह बाहेरगावी निघून गेली होती. साधारणत: वर्षभरापूर्वी हे जोडपे पुन्हा कार्ला येथे नांदावयास आले होते. शुक्रवार, २ ऑक्टोबर रोजी ती पती सुरेंद्रसोबत दूचाकीने पातुरकडे येत होती. त्यावेळी तिचा भाऊ मागून ट्रॅक्टर घेऊन आला आणि त्याने दूचाकीला जोरदार धडक दिली. या अपघातात पती, पत्नी आणि त्यांची चार वर्षाची चिमुकली जखमी झाले. घटनेनंतर जखमींनी पोलीस ठाण्यात पोहोचून आपबिती सांगितली. याप्रकरणी पोलिसांनी युवतीच्या भावास लगेचच ताब्यात घेतले. त्यानंतर याबाबत गोंधळ निर्माण करणारी माहिती समोर आली. ब्रेक नादुरूस्त झाल्यामुळे मोटारसायकलला ट्रॅक्टरची धडक लागली असल्याचे युवतीच्या भावाने पोलिसांना सांगितले. युवतीनेही भावाचा बचाव करत, आपणास गावातील लोकांनी लाठय़ा-काठय़ांनी मारल्याचे सांगितले. यासंदर्भात पातुरचे ठाणेदार अनील जुमळे यांच्याशी संपर्क साधला असता ते म्हणाले की, ज्योत्स्नाने मारहाण केल्याची तक्रार दिली आहे; परंतु तिच्या शरिरावर मारहाणीच्या खुणा प्रथमदर्शनी तरी दिसल्या नाही. जखमींना वैद्यकीय तपासणीसाठी पाठविण्यात आले आहे. अहवाल प्राप्त झाल्यानंतर आणि तक्रारीची सत्यता पडताळल्यानंतर कारवाई केली जाईल.