मुलांच्या छळप्रकरणी मांत्रिकाची चौकशी सुरू

काही मुलांकडून बळजबरीने मंत्रजप करून घेणाऱ्या मनोज दुबे या मांत्रिकाची समता नगर पोलिसांनी कसून चौकशी सुरू केली

मुंबई : धनदांडग्यांना सुखसमृद्धी मिळवून देण्याच्या नावाखाली काही मुलांकडून बळजबरीने मंत्रजप करून घेणाऱ्या मनोज दुबे या मांत्रिकाची समता नगर पोलिसांनी कसून चौकशी सुरू केली आहे. दोन वर्षांपासून दुबेने येथील बंदिस्त बंगल्यात थाटलेला बाजार पोलिसांनी शुक्रवारी धडक कारवाई करीत उधळून लावला होता. दिवसाला एक हजार रुपये देण्याचे आमिष दाखवून दुबे बिहारमधून मुले आणत असे. बंगल्यात त्यांना उपाशीपोटी एका पायावर उभे करून त्यांच्याकडून २४-२४ तास मंत्रजप करून घेण्यात येत असत. त्यामुळे या छळाला कंटाळून अनेक मुले त्याच्या तावडीतून पळून गेली. अखेर पोलिसांना याची माहिती मिळताच त्यांनी २८ मुलांची सुटका केली. त्यापैकी १२ जण अल्पवयीन असून, ते गेले दोन ते तीन महिन्यांपासून हा अत्याचार सहन करीत होते. पीडित मुलांचे जबाब नोंदविण्यात येत असल्याचे वरिष्ठ पोलीस निरीक्षक डी. पाटील यांनी दिली.