ऑनलाइन लोकमत
पुणे, दि. 30 - एकटक बघणाऱ्याला जाब विचारत तक्रार करण्याची तंबी दिल्याने इन्फोसिस कंपनीतील इंजिनिअर रसिला राजू ओपी हिची हत्या करण्यात आल्याची धक्कादायक माहिती समोर आली आहे. आरोपी सुरक्षा रक्षकानं स्वत:च पोलिसांकडं तशी कबुली दिली. हत्या करून आसाममध्ये पळून जाण्याच्या प्रयत्नात असताना हिंजवडी पोलिसांनी आज पहाटे मुंबईहून त्याला अटक केली.
इन्फोसिस कंपनीच्या हिंजवडी फेज 2 मधील कार्यालयात रविवारी सायंकाळी कम्प्युटरच्या केबलने गळा आवळून रसिला ओपी हिची हत्या करण्यात आली. ही घटना समजल्यानंतर हिंजवडी पोलिसांनी वेगाने हालचाली करून बबन नावाच्या आरोपीला ताब्यात घेतलं. पोलिसांनी दिलेल्या माहितीनुसार, बबन हा इन्फोसिस कंपनीत सुरक्षा रक्षक म्हणून काम करत होता. तर, रसिला राजू ओपी (वय वर्षे 24 ) ही त्याच कंपनीत कम्प्युटर इंजिनीअर म्हणून काम करीत होती.
बबनला एसडीबी 10 या इमारतीच्या नवव्या मजल्यावर ड्युटी लागली होती. रविवार असल्यामुळे या मजल्यावर कमी कर्मचारी होते. ही संधी साधून बबन रसिलाकडे एकटक नजरेने पाहत होता. त्यावरून रसिलानं त्याला 'असे काय पाहतो' म्हणत हटकले. ई मेलवरून तुझी तक्रार करते आणि नोकरी घालवते, असे म्हणून ती आत गेली; तेव्हा तो तिच्या पाठोपाठ मिटिंगरूममध्ये गेला. तिची माफी मागितली आणि कम्प्युटरच्या केबलने गळा आवळून रसिलाची हत्या केला. त्यानंतर बबनने तेथून पळ काढला.
मूळगावी आसामला जाण्यासाठी तो मुंबईला गेला. दरम्यान, रसिला हिचा संपर्क होत नसल्याचे तिच्या वरिष्ठांनी कंपनीत कळवले होते. कंपनीतील अन्य सुरक्षा रक्षकांनी शोध घेतला असता रसिलाची हत्या झाल्याचे उघड झाले. पोलिसांना ही माहिती मिळताच कंपनीतील उपलब्ध सीसीटीव्ही फुटेज आणि तांत्रिक माहितीच्या आधारे बबनला मुंबई येथून पहाटे अटक करण्यात आली.