ऑनलाइन लोकमत
नागपूर, दि. 22- आपल्या देशात पत्रकार चुकीची माहिती देत असल्याची अनेकदा टीका होते. परंतु यात त्यांची चूक नाही. मुळात पाठ्यपुस्तकांमध्येच चुकीचा आणि भ्रम निर्माण करणारा इतिहास शिकविण्यात येत आहे. हा इतिहास बदलविण्याचा आमच्या सरकारचा प्रयत्न राहणार असून येत्या २ वर्षांत इतिहासाची पाठ्यपुस्तके बदलण्यात येतील, असे प्रतिपादन खासदार डॉ.सुब्रमण्यम् स्वामी यांनी केले. महर्षी नारद जयंतीनिमित्त विश्व संवाद केंद्राच्या विदर्भ प्रांतातर्फे पत्रकार पुरस्काराचे वितरण करण्यात आले. यावेळी ते बोलत होते.सिव्हील लाईन्स येथील चिटणवीस केंद्र येथे झालेल्या या कार्यक्रमात राष्ट्रीय स्वयंसेवक संघाचे अखिल भारतीय सहप्रचार प्रमुख जे. नंदकुमार, माजी खासदार बनवारीलाल पुरोहित व विश्व संवाद केंद्राचे प्रमुख सुधीर पाठक उपस्थित होते. आपल्या देशात अगदी आर्य काळापासूनचा चुकीचा इतिहास विद्यार्थ्यांना शिकविण्यात येत आहे. देशात अनेक शूरवीर होऊन गेले. हिंदूंनी गेल्या हजारो वर्षांपासून स्वत:चे अस्तित्व टिकविण्यासाठी संघर्ष केला असताना मुघलांच्या इतिहासाचे धडेच्या धडे आहेत. हे अयोग्य असून यात बदल होणे आवश्यक असल्याचे ते म्हणाले. आपल्या देशात पत्रकारांनी सकारात्मक पत्रकारिता करण्याची आवश्यकता आहे. मुळात नोकरीसाठी पत्रकारितेची पदवी ही अट ठेवायलाच हवी आणि कायद्याबाबत त्यांना प्रशिक्षण द्यायला हवे, असे डॉ. स्वामी म्हणाले. देवर्षी नारद हे पहिले पत्रकार होते. परंतु चित्रपट आणि मालिकांमधून त्यांची प्रतिमा विनोदात्मक पद्धतीची करण्यात आली. काही लोकांनी जाणूनबुजून असे केले, असा आरोप जे. नंदकुमार यांनी लावला. यावेळी बबन वाळके आणि जयेश जग्गड यांना पत्रकारिता पुरस्काराने सन्मानित करण्यात आले. शिवाय विश्व संवाद केंद्राचे सहप्रमुख प्रसाद बर्वे यांनी लिहिलेल्या देवर्षी नारद : जीवन आणि कार्य या पुस्तकाचेदेखील प्रकाशन करण्यात आले. राज ठाकरे आणि यूपीतील टॅक्सीवाल्यांचा डीएनए एकचइतिहासात आर्य बाहेरून आले व द्रविडांवर अन्याय केले, असे शिकविले जाते. परंतु आपल्या देशात सुरुवातीपासून एकतेचे वातावरण चालत आले आहेत. देशातील सर्वांचा ह्यडीएनएह्ण हा एकच आहे. अगदी राज ठाकरे आणि यूपीमधून मुंबईत आलेले टॅक्सीवाले यांची तपासणी केली तरी त्यांचा डीएनएदेखील सारखाच असेल, असे प्रतिपादन डॉ.स्वामी यांनी केले.निवडणुका पाहून मी राम मंदिराबाबत बोलत नाहीयावेळी डॉ. सुब्रमण्यम् स्वामी यांनी राम मंदिरावरून त्यांच्यावर होणाऱ्या टीकेवर भाष्य केले. राम मंदिराबाबत मी निवडणुका पाहून बोलत नाही. देशात धर्मनिरपेक्ष होण्याची फॅशन आली आहे. अयोध्येत राम मंदिर होते हे पुरातत्व विभागाच्या पाहणीत सिद्ध झाले आहे. त्यामुळे येथे मंदिर व्हायलाच हवे, असे डॉ.स्वामी म्हणाले.