खामगावजवळ गॅसचा टँकर उलटला !

वायुगळतीच्या भीतीने राष्ट्रीय महामार्गावरील वाहतूक सहा तास ठप्प.

खामगाव (जि. बुलडाणा) : मुंबईवरुन नागपूरकडे निघालेल्या गॅसच्या टँकर खामगाव-बाळापूर मार्गावर तरोडानजिक गुरुवारी सकाळी ९ वाजता अपघात झाला. टँकरमधून वायुगळती होण्याच्या शक्यतेने खबरदारीचा उपाय म्हणून पोलिसांनी या महामार्गावरील काही वाहतूक अन्य मार्गाने वळविली. मात्र जड व मालवाहू वाहनांसाठी हा मार्ग तब्बल सहा तास ठप्प होता. दरम्यान, या घटनेत टँकरचालक गंभीर जखमी झाला आहे. खामगाव-अकोला महामार्ग क्र.६ वरील तरोडा (कसबा) गावाजवळ जीजे १२ एवाय १९८४ क्रमांकाच्या गॅस टँकरला अपघात झाला. यामुळे गॅसच्या टँकरला गळती लागली होती. गॅस गळतीचा संभाव्य धोका ओळखून राष्ट्रीय महामार्गावरील वाहतूक बंद करण्यात आली. काही वाहने जवळा, शेगाव मार्गे वळविण्यात आली. सुरक्षेचा उपाय म्हणून अपघातग्रस्त टँकरच्या परिसरात अकोला व खामगाव मार्गावरील एक किलोमीटर परिसरात मोबाईलबंदी करण्यात आली होती. गॅस गळती रोखण्यासाठी गॅस कंपनीचे तंत्रज्ञ बोलावून त्यांनी गॅस गळती थांबवली. सकाळी १0 वाजेपासून ते दुपारी ४ वाजेपर्यंंत जड वाहतूक पूर्णत: बंद करण्यात आली होती. या अपघातामुळे मात्र काही वेळ घबराट निर्माण झाली होती.