ऑनलाइन लोकमत -
सोलापूर, दि. 03 - प्रियकरासोबत पळून गेल्याचा राग मनात धरुन मामासह त्याच्या साथीदारांनी चक्क भाचीचा खून करुन पुरावा नष्ट करण्यासाठी त्याच दिवशी प्रेत जाळून टाकले. हा प्रकार २४ एप्रिल २0१६ रोजी मड्डी वस्ती येथे घडला. या प्रकरणी सहा जणांविरुद्ध गुरुवारी रात्री उशिरा गुन्हा नोंदवण्यात आला.
राजश्री आकाश भोसले (वय २४, रा. रविवार पेठ, जोशी गल्ली, सोलापूर) असं मयत तरुणीचं नाव आहे. पांडुरंग विठ्ठल भोसले (वय ४५, रा.सरवदेनगर, मुळेगाव रोड, सोलापूर) यांनी या प्रकरणी जोडभावी पेठ पोलीस ठाण्यात फिर्याद दिली होती. त्यावरुन पोलिसांनी युवराज कोंडिबा सरवदे, विनोद कोंडिबा सरवदे, किशोर ज्ञानेश्‍वर सरवदे, अनिल नारायण सरवदे, प्रभाकर शंकर भोसले, विष्णू मारुती भोसले यांच्याविरुद्ध गुन्हा दाखल केला आहे.
यातील मयत ही फिर्यादीचा पुतण्या ईश्‍वर मारुती भोसले यांच्यासोबत २८ मार्च २0१६ रोजी मुंबईला पळून गेली होती. याचा राग मनात धरुन आरोपींनी मयत राजश्रीला गोड बोलून मुंबईहून सोलापूरला आणून मामा विष्णू मारुती भोसले यांच्या घरी आणले. त्यानंतर आरोपींनी कट रचून राजश्रीला ठार मारुन त्याच दिवशी प्रेत जाळून पुरावा नष्ट केला.
दिड महिन्यानंतर गुन्हा दाखल
मयत राजश्रीला २४ एप्रिल रोजी तिच्या मामाच्या घरी आणून दुपारी दीड वाजता खून करण्यात आला. याबाबत कोणताही पुरावा सापडू नये म्हणून मयत राजश्रीचे प्रेत त्याच दिवशी जाळून टाकले; मात्र तब्बल दीड महिन्यानंतर या प्रकरणाला वाचा फुटून मामासह सहा जणांविरुद्ध गुन्हा दाखल झाला. घटनास्थळी वरिष्ठ पोलीस अधिकार्‍यांनी भेट दिल्याचे जोडभावी पेठच्या पोलिसांनी सांगितले.