ऑनलाइन लोकमत -
मुंबई, दि. ७ - भारतीय नौदलाच्या आयएनएस विराटला लागलेल्या आगीत एका इंजिनिअरचा मृत्यू झाला असून तिघेजण जखमी झाले आहेत. रविवारी दुपारी ही घटना घडली आहे.
आयएनस विराट सध्या गोव्याच्या समुद्रकिना-यात तैनात आहे. दुपारच्या सुमारास बॉयलर रुममधून वाफेची गळती झाल्यामुळे ही आग लागली. आगीवर तात्काळ नियंत्रण आणण्यात आलं मात्र धुरामुळे उपस्थित 4 खलाशांचा श्वास गुदमरला असल्याची माहिती अधिका-यांनी दिली आहे.
जखमी खलाशांपैकी चीफ इंजिनिअरिंग मेकॅनिक आशु सिंग यांना गोव्यातील नौदलाच्या रुग्णालयात भर्ती करण्यात आलं होतं. मात्र उपचारादरम्यानच त्यांचा मृत्यू झाला. इतर 3 खलाशांवर उपचार सुरु असून त्याची प्रकृती स्थिर आहे. याप्रकरणी सध्या चौकशी सुरु आहे. आयएनस विराट यावर्षी सेवेतून निवृत्त होतं आहे.