ऑनलाइन लोकमत
मुंबई, दि. ८ - बदलापूर- अंबरनाथ स्थानकांदरम्यान मालगाडीचे इंजिन फेल झाल्याने मध्य रेल्वेची वाहतूक विस्कळीत झाली आहे. शनिवारी सकाळी ८ च्या सुमारास ही घटना घडली. कर्जतहून मुंबईच्या दिशेने येणा-या मालगाडीचे इंजिन बदलापूर- अंबरनाथ दरम्यान बंद पडले. त्यामुळे मागून सीएसटीच्या दिशेने येणा-या गाड्याही अडकून पडल्या असून प्रवाशांना नाहक मनस्ताप सहन करावा लागत आहे.
मध्य रेल्वेचे अधिकारी घटनास्थळी दाखल झाले असून कल्याणहून नवे इंजिन आणून ही मालगाडी सुरू करण्यात येईल व लोकलचा खोळंबा दूर होईल असे सांगण्यात येत आहे. मात्र या सर्व प्रक्रियेस नेमका किती कालावधी लागेल हे अद्याप स्पष्ट झालेले नसून कामावर निघालेल्या चाकरमान्यांना त्रास सहन करावा लागत आहे.