नासीर कबीर￭ करमाळा
व्हॉट्सअँप, फेसबुक, हाईक यासारख्या सोशल मीडियाचा वापर करताना कोणत्याही नेत्याची बदनामी करणे, सामाजिक शांतता बिघडविणे वा कोणाच्या भावना दुखावण्यासारखा प्रकार करणे आता परवडणार नसून गुन्ह्याच्या तीव्रतेनुसार ३ वर्षे कारावास ते ५ लाखांपर्यंतच्या दंडाची शिक्षा भोगावी लागणार आहे.
लोकसभा निवडणूक काळात आपले सर्मथन असणार्या नेत्यांचे उदात्तीकरण करताना विरोधी नेतेमंडळींची चेष्टा उडविणारे, बदनामी करणारे मेसेज, फोटो सोशल मीडियावर मोठय़ा प्रमाणात फिरत होते. आता विधानसभा निवडणुकीचे बिगुल वाजल्यापासून पुन्हा एकदा तशाच चुकीच्या घटनांची पुनरावृत्ती होऊ लागली आहे; मात्र आता सोशल मीडियाबाबत पोलीस यंत्रणा अधिक जागरुक झाली आहे. नेटकर्यांनी अशा प्रकारच्या घटनांपासून दूर राहणे गरजेचे आहे. कायद्याच्या कचाट्यात सापडून शिक्षा भोगावी लागण्याची शक्यता आहे.
गत लोकसभा निवडणुकी दरम्यान सोशल मीडियाचा गैरवापर झाल्याची उदाहरणे पुढे आली होती. राजकीय नेत्यांची चेष्टा करणारे मेसेज, फोटो, विनोद सोशल मीडियावर सातत्याने दिसत होते. आता विधानसभेच्या पार्श्वभूमीवरही तशाच प्रकारांची पुनरावृत्ती होण्यास सुरुवात झाली आहे. सोशल मीडियाचा गैरवापर करणे महागात पडणार आहे. त्याचा गैरवापर केल्याचे सिद्ध झाल्यास भारतीय दंडविधान संहिता २९५/६६/अ अन्वये कायदेशीर कारवाई होऊ शकते. आक्षेपार्ह मजकूर, फोटो, विनोद याबाबत जागरुक राहणे आवश्यक बनले आहे.
सोशल मीडियावर काही आक्षेपार्ह किंवा भावना दुखावणारा मजकूर, बदनामीकारक फोटो असे काही आढळल्यास पोलीस ठाण्याशी संपर्क साधावा. सोशल मीडियावर गैरप्रकार करणार्यांवर योग्य ती कायदेशीर कारवाई करण्यात येईल.- अनिल पाटील, उपविभागीय अधिकारी, करमाळा
￭ सोशल मीडियाच्या विश्वात एखादा मजकूर, फोटो, कॉपी, पेस्ट शेअर करतानाच तो लाईक करणे, त्यावर कॉमेंट देणे याची स्पर्धाच लागल्याचे दिसते आहे. मात्र हे करताना सावधानता बाळगली नाही तर कायद्याच्या कचाट्यात सापडण्याचा धोका आहे. तेव्हा व्हॉट्सअँप, फेसबुकचा वापर करताना डोळसपणे पाहणे आवश्यक आहे.