ऑनलाइन लोकमत -
जालना, दि. 20 - आपल्या 2 वर्षाच्या चिमुरडीसमोरच अशोक लखनलाल सुरा याने आपल्या पत्नीची हत्या केल्याची धक्कादायक घटना घडली आहे. हत्या केल्यानंतर अशोक सुरा स्वत: पोलिसांसमोर हजर झाला आणि आपला गुन्हा कबूल केला. पोलिसांनी सदर बाजार पोलीस ठाण्यात हत्येचा गुन्हा दाखल केला असून अशोका सुराला अटक केली आहे.
अशोक सुरा याची पत्नी पूजासोबत नेहमी भांडणं होत असे. पूजा छोट्या छोट्या गोंष्टींवरुन माझ्याशी भांडायची, मला त्रास द्यायची त्यामुळे आपण हत्या केल्याची कबुली अशोक सुराने दिली आहे. अशोक आणि पूजाचं सहा वर्षापुर्वी लग्न झालं होतं. त्यांना दोन मुली आहेत. एक पाच वर्षाची असून दुसरी दोन वर्षाची आहे.
अशोक सुरा पोलीस ठाण्यात हजर झाल्यानंतर पोलिसांनी घटनास्थळी धाव घेतली. पोलीस घटनास्थळी पोहोचले तेव्हा पूजा रक्ताच्या थारोळ्यात पडली होती. पोलिसांनी मृतदेह ताब्यात घेऊन शवविच्छेदनासाठी रुग्णालयात पाठवला आहे.
'हे दांपत्य एकत्र कुटुंबात राहत होतं. आरोपी अशोक सुरा दारुच्या आहारी गेला होता. पत्नीची हत्या केली त्यादिवशी त्याने तिच्या तोंडात कापडाचा गोळा भरला होता, जेणेकरुन तिचा आवाज बाहेर जाऊ नये. हल्ल्याच्या दरम्यान पूजाने स्वत:ला वाचवण्याचा खूप प्रयत्न केला. मात्र तिच्यावर चाकूने वार करण्यात आले, ज्यामधील एक वार तिच्या गळ्यावर करण्यात आला. पूजाने मदतीसाठी केलेली याचना कोणाला ऐकू जाऊ नये यासाठी त्याने टिव्हीचा आवाजही वाढवून ठेवला होता', अशी माहिती पोलीस उप-निरीक्षक जयसिंग परदेशी यांनी दिली आहे.
हत्या केल्यानंतर आरोपी अशोक सुरा पोलीस ठाण्यात हजर राहण्यासाठी निघाला. त्यावेळी त्याची दोन वर्षाची मुलगी जिने हा सर्व प्रकार स्वत:च्या डोळ्यांनी पाहिली ती आजीकडे धावत गेली आणि सगळी घटना सांगितली. पोलिसांनी सदर बाजार पोलीस ठाण्यात गुन्हा नोंद केला असून आरोपीला अटक केली आहे.