अमळनेर : विधवा महिलेस लग्नाचे आमिष दाखवून तिच्यावर बलात्कार करणाऱ्या आणि सोशल मीडियावर त्या महिलेचे फोटो टाकून बदनामी करून धमकी देणारा तरुण आणि राजे संभाजी ग्रुपच्या २५ ते ३० जणांवर अमळनेर पोलिसात न्यायालयाच्या आदेशाने चौकशीनंतर गुन्हा दाखल करण्यात आला आहे. एका ३५ वर्षीय विधवा महिलेस लक्ष्मण उर्फ पप्पू महाजन याने लग्नाचे आमिष आणि मुलांचे पालन पोषणाचे आमिष दाखवून १६ आॅगस्ट २०१२ ते १० मार्च २०१७ दरम्यान नाशिक तसेच अमळनेर येथे बलात्कार केला. तसेच धाक दाखवला, तर राहुल महाजन (३५) याने व राजे संभाजी ग्रुपवरील २५ ते ३० सदस्यांनी त्या महिलेचे अश्लील फोटो प्रसिद्ध करून शिवीगाळ व दमदाटी केली, अशा आशयाची तक्रार महिलेने न्यायालयात दाखल केली होती. न्यायालयाने कलम १५६ (३) प्रमाणे तीन दिवसात चौकशीचे आदेश दिले होते. पोलिसांनी या प्रकरणाची चौकशी करून लक्ष्मण महाजन, राहुल महाजन यांच्यासह राजे संभाजी सोशल मीडिया ग्रुपच्या २५ ते ३० सदस्यांवर बलात्कार, बदनामी तसेच सायबर क्राईम प्रमाणे गुन्हा नोंदविण्यात आला आहे. (प्रतिनिधी)
महिलेची सोशल मीडियावर बदनामी करणाऱ्यांवर गुन्हा
By admin | Updated: March 13, 2017 03:49 IST