ऑनलाइन लोकमत
मुंबई दि. १४ – नीट परिक्षेला बसलेल्या महाराष्ट्रातील लाखो विद्यार्थ्यांचे मनोधैर्य वाढविण्याचा प्रयत्न राज्य सरकार करीत असून महाराष्ट्र सरकाराच्या आग्रहाखातर केंद्रीय आरोग्य मंत्री जे.पी.नड्डा यांनी देशातील सर्व राज्यांमधील आरोग्य आणि वैद्यकीय मंत्र्यांची सोमवारी १६ मे रोजी नवी दिल्लीत बैठक बोलविली आहे.
या बैठकीत आपण उपस्थित राहणार असून सर्वोच्च न्यायालयाने नीट संदर्भात दिलेल्या निकालानंतर एमबीबीएस आणि बीडीएसच्या विद्यार्थ्य़ांसाठी अन्य कोणते पर्याय उपलब्ध होऊ शकतील, तसेच यांसदर्भात केंद्र सरकारच्या वतीने अधिसूचना काढता येऊ शकतो काय याचाही विचार सर्व मंत्र्यांच्या बैठकीत करण्यात येईल.
तसेच सर्वोच्च न्यायालयाच्या निकालानुसार २४ जुलै रोजी होणा-या नीट परिक्षेची महाराष्ट्रातील विद्यार्थ्याच्या पूर्वतयारीसाठी राज्य सरकारच्या माध्यमातून दूरदर्शन, खासगी न्यूजचॅनेल, इंटरनेट अथवा युट्युब मार्फत प्रथितयश शिक्षणतज्ज्ञाचे विशेष कोचिंग प्रसारित करण्याचा कार्यक्रम आखण्यात येत असून येत्या १९ मे पासून हे प्रसारण सुरु करण्याचा सरकारचा विचार असल्याचे वैदयकीय शिक्षण मंत्री श्री. विनोद तावडे यांनी आज पत्रकार परिषदेत स्पष्ट केले.
महाराष्ट्र सरकारची फेरविचार याचिका अद्यापही सर्वोच्च न्यायालयात प्रलंबित आहे. तसेच नीट संदर्भात केंद्र सरकारला अधिसूचना काढता येऊ शकतो वा नाही, अधिसूचना काढल्यास त्याबाबतचे कायदेशीर मुद्दे आदी सर्व मुद्द्यांचा विचारविमर्श करण्यात येणार असल्याचे सांगतानाच श्री. विनोद तावडे म्हणाले की, २४ जुलै रोजी होणा-या नीट परिक्षेसाठी महाराष्ट्रातील विद्यार्थ्यांचे योग्य पध्दतीने कोचिंग होण्यासाठी या विद्यार्थ्यांनी विशेष प्रशिक्षण देण्याची राज्य सरकारने तयारी केली आहे.
दूरदर्शन आणि खासगी न्यूज चॅनेल्स वर विशिष्ट वेळेत दर दिवशी १ तास हे कोचिंग करण्यात येईल. या एका तासात दोन विषय प्रत्येकी अर्धा तास शिकविण्यात येतील. या प्रशिक्षणासाठी काही चॅन्ल्सनी कोणाताही आर्थिक मोबदला न घेता या प्रसारणाची तयारी दर्शविली आहे. वेबसाईटच्या माध्यमातूनही हे प्रशिक्षण देण्यात येईल.
त्याचप्रमाणे या कोचिंगचे विभागाच्या वतीने मोबाईल अॅप्लिकेशन तयार करण्यात येणार असून विद्यार्थ्यांना प्रश्न विचारण्याची सुविधाही उपलब्ध करुन देण्यात येईल. नीट परिक्षेचा अभ्यास कसा असेल, परिक्षेची पूर्व तयारी कोणत्या पध्दतीने करायची याचे कोचिंग विद्यार्थ्यांना देण्यात येईल, असेही त्यांनी स्पष्ट केले.
नीट साठी सरकार ऑनलाईन प्रशिक्षण देण्याच्या बातमीमुळे खासगी कोचिंग क्लास चालकांचे धाबे दणाणले आहेत. म्हणून सरकारी कोचिंग एचएससी बोर्डाच्या शिक्षण तज्ज्ञांमार्फत देण्यात येईल असा अपप्रचार त्यांनी सुरु केला आहे. परंतु राज्याचे विशेष कोचिंग नक्कीच प्रभावी असेल असा विश्वास व्यक्त करतानाच श्री. तावडे यांनी सांगितले की, हे प्रशिक्षण सहा दिवस चालणार असून सातव्या दिवशी विद्यार्थ्यांना प्रश्न विचारण्याची संधी मिळणार असून त्यांच्या प्रश्नांना शिक्षणतज्ज्ञांमार्फत उत्तरे दिली जातील.
महाराष्ट्र सरकार नीट परिक्षेसाठी बसणा-या लाखो विद्यार्थ्यांसाठी अखेरपर्यंत लढा देणार आहे. प्रसंगी महाराष्ट्रातील केंद्रीय मंत्र्यांच्या मदतीने राष्ट्रपतींची भेट घेतली जाईल, हा विषय त्यांच्यापर्यंत पोहचविण्यात येईल आणि यामधून मार्ग काढण्याचा नक्कीच प्रयत्न करण्यात येईल असेही त्यांनी स्पष्ट केले.