ऑनलाइन लोकमत
मुंबई, दि. २९ - तांत्रिक कारणांमुळे मध्य रेल्वेच्या कर्जत व कसाराहून मुंबई छत्रपती शिवाजी टर्मिनसकडे येणारी लोकल वाहतूक विस्कळीत झाली असून प्रवाशांना त्याचा चांगलाच फटका बसला आहे. शुक्रवारी सकाळी आसनगाव स्थानकाजवळ मालगाडीच्या इंजिनात बिघाड झाल्याने मुंबईच्या दिशेन येणा-या लोकल वाहतुकीवर परिणाम झाला. ब-याच प्रयत्नांनंतर आता हे इंजिन ट्रॅकवरून बाजूला हटवण्यात यश आले असले तरी रेल्वेचे बिघडलेले वेळापत्रक पूर्ववत व्हायला आणखी थोडा वेळ लागेल.
तर दुसरीकडे कर्जत-खोपोली मार्गावरील पळसदरी स्थानकाजवळ वीज पुरवठा खंडित झाल्यानेही खोपोली-कर्जत लोकलसेवा विस्कळीत झाली. याचा फटका सीएसटीच्या दिशेने येणा-या गाड्यांवरही झाला असून गाड्या २०-२५ मिनिटे उशीराने धावत आहेत. दरम्यान हा वीजपुरवठा पुन्हा सुरू करण्याचे प्रयत्न सुरू असून तोपर्यंत सर्व गाड्या केवळ कर्जतपर्यंतच चालवण्यात येणार आहेत.
त्यामुळे प्रत्येक स्थानकांवर व गाड्यांमध्येही बरीच गर्दी झाली असून चाकरमान्यांचे मोठे हाल होत आहेत.
पश्चिम रेल्वेही झाली ठप्प
मध्य रेल्वेपाठोपाठ पश्चिम रेल्वेवरही बिघाड झाल्याने रेल्वे वाहतूकीवर परिणाम झाला. बोईसर - पालघरदरम्यान तांत्रिक बिघाड झाल्याने डहाणूहून चर्चगेटच्या दिशेने जाणारी लोकल वाहतूक विस्कळीत झाली. तसेच गुजरातहून येणा-या मेल गाड्यांवरही परिणाम झाला.