‘सनातन’ साधकांच्या घरांवर सीबीआय छापे

अंधश्रध्दा निर्मूलन समितीचे संस्थापक डॉ. नरेंद्र दाभोलकर यांच्या हत्येचा तपास करीत असलेल्या केंद्रीय अन्वेषण विभागाच्या (सीबीआय) पथकाने बुधवारी पुणे आणि पनवेल येथील

पुणे/नवी दिल्ली : अंधश्रध्दा निर्मूलन समितीचे संस्थापक डॉ. नरेंद्र दाभोलकर यांच्या हत्येचा तपास करीत असलेल्या केंद्रीय अन्वेषण विभागाच्या (सीबीआय) पथकाने बुधवारी पुणे आणि पनवेल येथील सनातन संस्थेच्या साधकांच्या घरांवर छापे टाकल्याने या प्रकरणाच्या तपासाला नवे वळण मिळाली आहे. दरम्यान, डॉ. दाभोलकर यांच्या मारेकऱ्यांची ओळख पटली असून, सनातन संस्था व हिंदू जनजागरण समितीनेच त्यांची हत्या केली, असा खळबळजनक दावा आम आदमी पक्षाचे आशिष खेतान यांनी केला आहे.गोव्यातील बॉम्बस्फोटप्रकरणी आधीपासूनच राष्ट्रीय तपास संस्थेच्या (एनआयए) रडारवर असलेल्या सारंग आकोलकरच्या पुण्यातील घरासह पनवेलमधील डॉ. वीरेंद्रसिंह तावडे आणि देवद आश्रमामध्ये सीबीआयने छापे टाकून घराची झडती घेतली. अकोलकरच्या घरामधून वर्तमानपत्रांची कात्रणे, वीजबिल, जुने बँक पासबुक आणि काही कागदपत्रे ताब्यात घेण्यात आली आहेत, तर डॉ. तावडेंचा लॅपटॉप पोलिसांनी ताब्यात घेतला आहे. दोन्ही ठिकाणी सकाळी सात वाजता सुरू करण्यात आलेली ही झडती दुपारी दोन वाजेपर्यंत सुरू होती. आॅगस्ट २०१३ मध्ये विवेकवादी विचारवंत दाभोलकर यांची हत्या झाल्यानंतर महाराष्ट्र पोलिसांना तपासात फारशी प्रगती साधता आली नव्हती. त्यानंतर मुंबई उच्च न्यायालयाने सीबीआयकडे तपास सोपविला होता. कट्टर हिंदुत्ववादी आणि उजव्या विचारसरणीची संघटना म्हणून सनातन संस्थेची ओळख असून गोव्यातील पोंडा येथे मुख्यालय आहे. दाभोलकर यांच्या हत्याकांडातील मुख्य कटकर्ता म्हणून आकोलकरवर संशय व्यक्त होत असतानाच एनआयएच्या तपासातही त्याचे नाव समोर आल्याने त्याच्यासह सनातनचे अनेक सदस्य भूमिगत झाले आहेत. दाभोलकरांची हत्या झाल्यापासून सनातन संस्थेकडे संशयाची सुई फिरत होती. सीबीआयलाही मडगाव बॉम्बस्फोटातील फरार आरोपी असलेल्या सारंग अकोलकर आणि रुद्रगौडा पाटील या दोघांवर संशय आहे. सीबीआयने संशयितांची काढलेल्या रेखाचित्रांचे अकोलकर आणि रुद्रगौडा पाटीलच्या चेहऱ्यांशी साम्य आहे. त्यादिशेने तपास करताना मिळालेल्या काही दुव्यांच्या आधारे सीबीआयने अकोलकरच्या पुण्यातील घरी छापा टाकून झडती घेतली. सीबीआयच्या मुंबईहून आलेल्या पथकामध्ये तपास अधिकारी तथा अधीक्षक एस. आर. सिंग यांच्यासह आठजण होते. त्यांनी पंचही सोबतच आणलेले होते. सीबीआयच्या दोन पथकांनी पनवेलमध्ये दोन ठिकाणी छापे टाकले.पनवेलमधील देवद येथील सनातनच्या आश्रमामध्ये १२ जणांचे एक पथक चौकशीसाठी गेले होते. तर दुसऱ्या पथकाने कल्पतरु सोसायटीमधील डॉ. वीरेंद्रसिंग तावडे यांच्या घरी पोलिसांनी छापा टाकला. दोन्ही ठिकाणी झडती घेण्यात आली. सनातनच्या आश्रमातील साधकांकडे चौकशी करण्यात आली असून डॉ. तावडे यांच्या कुटुंबियांकडे चौकशी केल्याची माहिती सुत्रांनी दिली. पूर्ण नाव सारंग दिलीप अकोलकर (वय ३०, रा. डी विंग, डीएसके चिंतामणी, शनिवार पेठ) असे आहे. बाजीराव रस्त्यावरच्या नू.म.वि. शाळेमध्ये शालेय शिक्षण घेतलेल्या सारंगने आबासाहेब गरवारे महाविद्यालयातून महाविद्यालयीन शिक्षण पूर्ण केले आहे, तर त्याने भारती विद्यापीठामधून २००३ मध्ये ‘इलेक्ट्रिक इंजिनीअरिंग’ची पदवी घेतलेली आहे. सनातन संस्थेचा तो पूर्णवेळ साधक आहे. गोव्यातील मडगावमध्ये २००९ साली झालेल्या बॉम्बस्फोटानंतर अकोलकर फरार झाला असून, तपास यंत्रणा मागावर आहेत....तरीही शोध नाहीएनआयएने २०१२ मध्ये अकोलकरला पकडण्यासाठी इंटरपोलमार्फत रेड कॉर्नर नोटीस जारी करूनही त्याचा छडा लालेला नाही. त्याच्याशी संबंधित ठिकाणांवरील धाडसत्र सुरूच असल्याचे सीबीआय सूत्रांनी सांगितले. पूर्वनियोजित षड्यंत्र‘आप’चे आशिष खेतान सीबीआयच्या कारवाईपूर्वी टिष्ट्वट करतात आणि मग कारवाई होते, हे पूर्वनियोजित षड्यंत्र आहे. आशिष खेतानच्या तालावर सीबीआय काम करते, असा आरोप सनातनचे प्रवक्ते अभय वर्तक यांनी केला आहे. उच्च न्यायालयाने फटकारल्यानंतरच ‘सीबीआय’ सक्रिय झाली. उशिराने का होईना, त्यांनी काहीतरी कृती केली आहे. - डॉ. मेघा पानसरेआशीष खेतानला धडा शिकवूसनातनवर आरोप करणाऱ्या आशीष खेतान यांना धडा शिकवू, अशी गर्भीत धमकी संजीव पुनाळेकर यांनी पत्रकार परिषदेत दिली. मात्र, पत्रकारांनी ‘धमकी’चे गांभिर्य लक्षात आणून देताच ‘आशीष खेतान यांना सनदशीर मार्गाने धडा शिकवू’, अशी सारवासारव पुनाळेकर यांनी केली.