हावडा-मुंबई एक्स्प्रेसमध्ये बॉम्बचा संशय

अकोला रेल्वे स्टेशनवर थांबविली रेल्वेगाडी, बेवारस बॅग जप्त.

अकोला: मुंबईकडे जाणारी १२८१0 हावडा-मुंबई एक्स्प्रेस रेल्वेगाडीमधील बेवारस बॅगमध्ये बॉम्ब असल्याच्या संशयावरून जीआरपी व रेल्वे सुरक्षा बलाच्या अधिकारी व श्‍वान पथकाने रेल्वेगाडी थांबविली आणि गाडीमध्ये तपासणी केली असता, एक बेवारस बॅग मिळून आली. परंतु त्या बॅगेत काहीच आक्षेपार्ह मिळून न आल्याने, प्रवाशांनी सुटकेचा नि:श्‍वास टाकला. बुधवारी रायपूरनजीक रेल्वे स्टेशनजवळ हावडा-मुंबई एक्स्प्रेसमध्येच काही विस्फोटके मिळून आली होती, हे येथे विशेष. मुंबईकडे जाणार्‍या हावडा-मुंबई एक्स्प्रेसमध्ये बेवारस बॅग असल्याची माहिती जीआरपी व रेल्वे सुरक्षा बलाच्या अधिकार्‍यांना मिळाली. या माहितीनुसार, पोलिसांनी हावडा-मुंबई एक्स्प्रेस अकोला रेल्वे स्टेशनवर येताच, जवळपास अर्धा तास सर्च मोहीम राबविली. सर्च मोहिमेदरम्यान श्‍वान पथकालासुद्धा पाचारण करण्यात आले होते. एक्स्प्रेसमधील एस ११ या डब्यामध्ये बेवारस बॅग मिळून आली. श्‍वान पथकाने बॅगेची तपासणी केली असता, त्यामध्ये काहीच आक्षेर्पाह मिळून आले नाही. पोलिसांनी ही बॅग ताब्यात घेतली आहे. बुधवारीच हावडा, छत्तीसगडमधील रायपूरनजीक रेल्वे स्टेशनजवळ मुंबई एक्स्प्रेसमध्ये घातक विस्फोटक पदार्थ मिळून आले होते. त्यानंतर ही बेवारस बॅग असल्याची माहिती समोर आल्याने प्रवाशांमध्ये एकच खळबळ उडाली. बॉम्बच्या अफवेने अनेक प्रवाशांनी गाडी बदलली. अकोला रेल्वे स्टेशनवर केलेल्या सर्च मोहिमेदरम्यान आक्षेपार्ह मिळून आले नाही. ही सर्च मोहीम रेल्वे सुरक्षा बलाचे पोलीस निरीक्षक राजेश बढे यांच्या मार्गदर्शनात श्‍वान पथकाचे हेड कॉन्स्टेबल रवी शेगोकार, महेंद्र मुरूमकार, मोहन येवतकर आणि जीआरपीचे एएसआय राजू पवार, प्रकाश डोंगरे यांनी राबविली.