जळालेला मृतदेह आढळला

आसोला येथील घटना; हत्त्या की आमहत्त्या याबद्दल संशय.

वाशिम : शेलूबाजार मार्गावरील आसोला येथे शेषराव बरडे यांच्या शेतात अज्ञात व्यक्तीचा मृतदेह जळालेल्या अवस्थेत आढळला. ही घटना १३ डिसेंबरला सकाळी ११.३0 वाजता उघडकीस आली. आसोला येथील शेषराव बरडे यांनी आपल्या शेतात ज्वारीची कापणी करून ठिकठिकाणी कडब्याच्या गंजी लावून ठेवल्या होत्या. शेतातील कडबा आणण्यासाठी ते रविवारी सकाळी ११ वाजता शेतात गेले असता, त्यांना कडब्याची एक गंजीसह एक मृतदेह जळाल्याचे निदर्शनास आले. मृतदेहाच्या गळ्याला लोखंडी तार आवळल्याच्या खुणा असून हत्या केल्यानंतर मृतदेह जाळण्यात आला असल्याची शक्यता वर्तविण्यात येते. दरम्यान, मृतदेह नेमका महिला की पुरुषाचा, याचा शोध घेण्यासाठी पोलीसांनी अमरावती येथील फॉरेन्सिक तज्ज्ञाला बोलावले आहे. या घटनेची माहिती त्यांनी वाशिम ग्रामीण पोलीसांना दिली. पोलीस उपनिरीक्षक मिलिंद पाठक, जमादार संजय आमटे, राजेश निर्बान, प्रेम राठोड, श्रीवास्तव, अमोल इंगोले व इतर अधिकारी व कर्मचार्‍यांनी घटनास्थळी येऊन पंचनामा केला.