ऑनलाइन लोकमत/ स्नेहा मोरे
मुंबई, दि. 23 - प्रभाग क्रमांक 220 मध्ये फेरमोजणीतही ‘सेम-सेम’ मतदान झालेल्या शिवसेना-भाजपाच्या उमेदवारांचे भवितव्य ईश्वरचिठ्ठीद्वारे ठरवण्यात आले. या ईश्वरचिठ्ठीच्या प्रक्रियेत भाजपाला लॉटरी लागली असून भाजपाचे उमेदवार व माजी आमदार अतुल शहा यांचा विजय झाला आहे.
सेना-भाजपात अटी-तटीची लढत झाल्यानंतर तणावपूर्ण वातावरण झालेल्या या प्रभागात अखेर शिवसेनेच्या सुरेंद्र बागलकर यांचा पराभव झाला असून भाजपाने बाजी मारली आहे.220 प्रभागात शिवसेना आणि भाजपामध्ये अटीतटीची लढत होती.
शिवसेना उमेदवार सुरेंद्र बागलकर आणि भाजपा उमेदवार आणि माजी आमदार अतुल शहा यांच्या प्रभागातील मतमोजणीच्या वेळी 13 फे-यानंतर दोघांचीही मते 5 हजार 946 आली. फेरमतमोजणीतही टाय झाल्याने ईश्वरचिठ्ठीचा निर्णय घेण्यात आला आहे.
फेरमतमोजणीनंतर झालेल्या बैठकीत निवडणुक अधिका-यांनी कायद्यातील तरतुदींचा आढावा घेऊन ईश्वरचिठ्ठीचा निर्णय घेतला. त्यानंतर दोन्ही पक्षांच्या दिग्गज नेत्यांच्या उपस्थित ही प्रक्रिया झाली, आणि मग भाजपा उमेदवार अतुल शहा यांना विजयी घोषित करण्यात आले.
#Flash: BJP's Atul Shah won ward no. 220 of BMC after lottery in presence of Municipal Commissioner. #BMCresults— ANI (@ANI_news) February 23, 2017