ऑनलाइन लोकमत
मुंबई, दि. ३०- भारतरत्न लता मंगेशकर आणि सचिन तेंडुलकर यांच्यावर अश्लाघ्य शब्दांनी टीका केलेला व्हिडीओ ब्लॉक करा, अशी मागणी आता होऊ लागली आहे. अनेक राजकारणी आणि सेलिब्रिटींनी हा व्हिडीओ सायबर सेलनं तात्काळ ब्लॉक करून तन्मय भट्ट अटक करावी, असं म्हटलं आहे.
तन्मय भट्टवर तात्काळ फौजदारी कारवाई करुन त्याच्यावर देशद्रोहाचा गुन्हा नोंदवावा, तसेच त्याला लवकरात लवकर अटक करावी, या मागणीसाठी महाराष्ट्र नवनिर्माण सेनेच्या सरचिटणीस शालिनी ठाकरे वांद्रे-कुर्ला संकुल येथील मुंबई पोलिसांच्या सायबर गुन्हे अन्वेषण विभागात ठाण मांडून बसल्या आहेत. जोपर्यंत देशद्रोही तन्मय दत्तवर पोलीस कारवाईचे लेखी आश्वासन देत नाहीत तोपर्यंत आपण पोलीस ठाण्यातून बाहेर जाणार नाही, असा पवित्रा शालिनी ठाकरे यांनी घेतला आहे. त्यांच्यासोबत पक्षाचे उपाध्यक्ष संदीप दळवी तसेच विभागअध्यक्ष तुषार आफळे, रविंद्र इंदुलकर यांच्यासह असेक महिला व पुरुष कार्यकर्तेही सायबर पोलीस ठाण्यात गेल्या दोन तासांपासून थांबले आहेत.
शालिनी ठाकरे यांच्या या आक्रमक पवित्र्यानंतर सायबर पोलिसांनी एआयबीचा व्हिडीओ इंटरनेटवरून काढून टाकण्यासाठी गुगल तसेच फेसबूक व यू ट्यूब व्यवस्थापनाशी संपर्क साधला आहे. मात्र तन्मय भट्टला अटक करण्यासाठी पोलिसांनी तत्काळ पावले उचलावीत, अशी भूमिका शालिनी ठाकरे यांनी घेतली आहे.