ऑनलाइन लोकमत
मुंबई, दि. १३ - थेट मनसेशी दोन हात करण्याचा इशारा देणारे भाजपचे मुंबईतील नेते मोहित कंबोज यांच्या मालाड येथील कार्यालयावर हल्ला करण्यात आला आहे. कंबोज यांच्या कार्यालयावर दगडफेक करुन तोडफोड करण्यात आली.
मोहित कंबोज हे मुंबई भाजपच्या उत्तर भारतीय मोर्चाचे अध्यक्ष आहेत. मनसे कार्यकर्त्यांनी कंबोज यांच्या कार्यालयावर हल्लाकेल्याचा अंदाज आहे. मुंबईमध्ये उत्तर भारतीयांचं तुम्ही किंवा तुमच्या कार्यकर्त्यांनी काही नुकसान केलं तर त्याच्यापेक्षा दुप्पट नुकसान तुमचं करु, असं थेट राज ठाकरेंना धमकी देणार पत्र कंबोज यांनी लिहील आहे.
तुम्हाला प्रेमाची भाषा समजत नसेल आणि फक्त मारहाणीचीच भाषा समजत असेल, तर ईंट का जवाब पथ्थर से देंगे असंही या पत्रात कंबोज यांनी म्हंटलं होतं.
राज ठाकरे यांनी मनसेच्या दहाव्या वर्धापनदिन कार्यक्रमात बोलताना नव्या रिक्षा रस्त्यावर आल्या तर, जाळून टाका असा आदेश दिला होता. नव्या देत असलेल्या रिक्षा परवान्यांमध्ये परप्रांतीय रिक्षाचालकांचा भरणा अधिक असल्याचा त्यांनी आरोप केला होता.