पामबीच मार्गावर अपघात

दोन भरधाव कार एकमेकांवर धडकल्याने अपघाताची घटना पामबीच मार्गावर सीवूड येथे घडली

नवी मुंबई : दोन भरधाव कार एकमेकांवर धडकल्याने अपघाताची घटना पामबीच मार्गावर सीवूड येथे घडली. या घटनेत कारमधील दोन महिला जखमी झाल्या असून त्यांच्यावर नेरुळच्या डी.वाय. पाटील रुग्णालयात उपचार सुरू आहेत.सोमवारी संध्याकाळी ४ वाजण्याच्या सुमारास सीवूड सेक्टर ५० येथे हा अपघात झाला. पामबीच मार्गावरुन सीबीडीच्या दिशेने भरधाव वेगात कार जात होती. यावेळी बेलापूरकडून आलेल्या दुसऱ्या कारने सिग्नल लागलेला असतानाही चौकात सीवूडकडे वळण घेतले. यामुळे सीबीडीच्या दिशेने जाणारी कार समोरच्या कारवर आदळून अपघात झाला. अपघातामध्ये दोन्ही कारचे मोठ्या प्रमाणात नुकसान झाले आहे. तर सिग्नल तोडून रस्ता ओलांडणाऱ्या कारमधील दोन महिला गंभीर जखमी झाल्या असून त्यांना उपचारासाठी नेरुळच्या डी. वाय. पाटील रुग्णालयात दाखल करण्यात आले आहे. सदर घटनेची माहिती मिळताच वाहतूक पोलिसांनी घटनास्थळी धाव घेत जखमींना मदत केली. तसेच दोन्ही अपघातग्रस्त वाहने पामबीच मार्गावरच पडून राहिली. दोन्ही अपघातग्रस्त वाहने बाजूला करुन मार्ग रहदारीसाठी मोकळा केला. (प्रतिनिधी)