कला केंद्रात विकलेल्या तरुणीवर वारंवार अत्याचार करून गर्भपात !

लग्नाचे आमिष दाखवून एका २१ वर्षीय युवतीवर जबरदस्तीने वारंवार अत्याचार तसेच तिचा गर्भपात केल्याप्रकरणी

आॅनलाईन लोकमत

 सातारा, दि. 3 - लग्नाचे आमिष दाखवून एका २१ वर्षीय युवतीवर जबरदस्तीने वारंवार अत्याचार तसेच तिचा गर्भपात केल्याप्रकरणी वडोली (भि.) ता. कऱ्हाड येथील एका तरुणासह अन्य चारजणांवर उंब्रज पोलिसांत रात्री उशिरा गुन्हा दाखल झाला आहे. विशेष म्हणजे, या तरुणीला इस्लामपूरच्या कला केंद्रात दहा हजार रुपयास विकल्याचेही तक्रारीत म्हटले आहे. 

  अमोल धनपूर्णा, माधुरी धनपूर्णा दोघे (रा. सूर्यनगर, अहमदनगर), सविता काळे (रा. इस्लामपूर, नूतन कला केंद्र), विनोद रामचंद्र तुपे (रा. वडोली ( भि.), पप्पू (पूर्ण नाव माहीत नाही, रा. कऱ्हाड ) अशी गुन्हा दाखल झालेल्या संशयित आरोपींची नावे आहेत.

 याबाबत पीडित युवतीने दिलेल्या फिर्यादीनुसार, जून २०१३ मध्ये अमोल व त्याची आई माधुरी यांनी पीडित युवतीस लग्नाचे आमिष दाखवून घरी नेले होते. त्यानंतर संबंधित पीडित युवतीने वारंवार विचारले की, ‘लग्न कधी करायचे,’ यावर अमोल व माधुरी या दोघांनी पीडित युवतीस इस्लामपूर येथील नूतन कला केंद्रात सविता काळे या महिलेस दहा हजार रुपयास विकले. दरम्यान, कला केंद्रात विनोद नामक तरुण नाचगाणे पाहण्यासाठी येत होता. त्यावेळी पीडित युवती व विनोद यांची ओळख झाली. 

मार्च २०१६ मध्ये ‘मी तुझ्याशी लग्न करतो. तुला व्यवस्थित सांभाळेन,’ असे म्हणून इस्लामपूर येथून उंब्रज, ता. कºहाड येथील हॉटेल विसावा येथे युवतीस आणले. ‘आपण उद्या लग्न करू,’ असे म्हणत मारहाण करून शरीरसंबंध प्रस्थापित केले. त्यानंतर सलग दहा दिवस मारहाण करून पीडित युवतीवर अत्याचार केला. 

त्यानंतरही विनोद याने उंब्रज परिसरात भाड्याची खोली, तसेच वेगवेगळ्या हॉटेलवर नेऊन २९ मार्च २०१७ पर्यंत वारंवार अत्याचार केला. पीडित युवती पुन्हा गर्भवती राहिली असता तिला हाकलून दिले. यावर पीडित युवती विनोद याच्या वडोली (भि.) येथील राहत्या घरी गेली असता त्याने चाकू फेकून मारला व राहत्या घरातून हाकलून दिले,  असे  पीडित युवतीने दिलेल्या फिर्यादीमध्ये नमूद केले असून, याप्रकरणी पाचजणांवर उंब्रज पोलिसांत रात्री उशिरा गुन्हा दाखल झाला आहे. तपास सहायक पोलिस निरीक्षक कुमार घाडगे करीत आहेत. 

गर्भपात कऱ्हाडात.. अर्भक पुरले चाफळला !

पीडित युवती गर्भवती राहिली असता पीडित युवती विनोद यास ‘आपण लग्न करू,’ असे वारंवार म्हणत होती. मात्र, विनोद याचे अगोदरच लग्न झाले असल्यामुळे ‘आपण गर्भपात करू, मगच मी तुझ्याशी लग्न करेन,’ असे विनोद म्हणत होता. यावेळी पीडित युवती गर्भपात करण्यास तयार नव्हती म्हणून विनोदचा मेहुणा पप्पू याने युवतीस जीवे मारण्याची धमकी देऊन कºहाड येथील एका हॉटेलच्या पाठीमागे असणाºया डॉक्टरकडून पीडित युवतीचा जबरदस्तीने गर्भपात केला व संबंधित अर्भक चाफळ, ता. पाटण येथे एका जागी पुरले.