ऑनलाइन लोकमत
लोणावळा, दि. ३ - मुंबई- पुणे एक्स्प्रेस वे वर लेन कटींग व ओव्हर स्पीडची कारवाई करण्यासाठी व्हीडीओ रेकाॅर्डिंग करणारे दोन पोलीस अपघातात जखमी झाले. बुधवारी सकाळी १०.३० च्या सुमारास हा अपघात झाला.
मिळालेल्या माहितीनुसार मुंबईहून पुण्याच्या दिशेने भरधाव वेगात निघालेली स्विफ्ट डिझायर कार ( एम एच १४ बी के ६८८७) च्या महिला चालकाचे गाडीवरील नियंत्रण सुटल्याने मळवली येथे लेन कटिंगची कारवाई करणारे दोन पोलीस कर्माचारी यांना गाडीची धडक बसली व सदर गाडी विरुध्द लेनवर पुणे लाईनवरुन मुंबईकडे जाणा-या टाटा बोल्ट गाडीला (क्रं एम एच १२एम एफ ०२५३) धडकून अपघात झाला. सुदैवाने या अपघातात कोणतीही जीवीत हानी झाली नसली तर दोन पोलीस कर्मचारी व टाटा बोल्ट गाडीचालक जखमी झाले आहेत.
शिवा हनुमंत मुसारगे व कैलास कदम असे या जखमी झालेल्या कर्मचार्यांची नावे आहेत. त्यांच्या पायाला व डोक्याला गंभीर मार लागला असून टाटा गाडीतील शासकीय सर्व्हे ऑफिसर चंद्रकांत शिंदे किरकोळ जखमी झाले आहेत.