अकोला : अशोक वाटिका चौकातून शुक्रवारी सायंकाळी ताब्यात घेतलेल्या ट्रकचालकाची चौकशी केल्यानंतर कोतवाली पोलिसांनी ट्रकसह ट्रकमधील ८ लाख ७१ हजार ५३५ रुपयांचा मुद्देमाल जप्त केला. या प्रकरणी पोलिसांनी ट्रकचालकास अटक केली असून, रविवारी त्याला न्यायालयात हजर करण्यात येईल. ट्रकमध्ये विद्युत डीपी व ट्रान्सफार्मरला लागणार्‍या ॲल्युमिनिअम व तांब्याच्या तारा चोरीच्या असल्याच्या संशयावरून कोतवाली पोलिसांनी शुक्रवारी सायंकाळी ट्रकचालकास ताब्यात घेतले. ट्रकमध्ये ॲल्युमिनिअम व तांब्याची तार नेत असल्याची माहिती पोलिसांना मिळाली. अशोक वाटिका चौकाजवळ आरजे ११ जीए ३0५६ क्रमांकाच्या ट्रकला कोतवाली पोलिसांनी थांबविले आणि ट्रक ताब्यात घेतला. या ट्रकमध्ये भांड्यांच्या मोडसोबतच विद्युत डीपी व ट्रान्सफार्मरला लागणार्‍या ॲल्युमिनिअम व तांब्याच्या तारा आढळून आल्या. या तारा वीज वितरण कंपनीच्या असून, त्या चोरीच्या असल्याच्या संशयावरून पोलिसांनी त्या जप्त केल्या आहेत. ८ क्यांमधील तांबे व ॲल्युमिनिअमच्या तारांची किंमत ८५ हजार रुपये आहे. तसेच पोलिसांनी ट्रकमधील ७ लाख ८६ हजार ५३५ रुपयांचे भंगार साहित्य आणि ८ लाख रुपये किमतीचा ट्रक जप्त केला. पोलिसांनी राजस्थानमधील ढोलपूर येथील राहणारा ट्रकचालक महेंद्रसिंग प्रजापत याला अटक केली. महेंद्रसिंगने हे साहित्य गंभीरदास अमरचंद यांच्या गोडावूनमधून आणल्याचे आणि हे साहित्य ट्रकने दिल्लीला नेत असल्याची माहिती पोलिसांना दिली. पोलिस आता गंभीरदास अमरचंद यांची चौकशी करणार आहेत. ही कारवाई ठाणेदार अनिरूद्ध आढाव यांच्या मार्गदर्शनात एएसआय रामभाऊ बंड, श्याम शर्मा, राजेंद्र तेलगोटे, शेख माजीद, नदीम खान यांनी केली.
ट्रकचालकाकडून १६ लाख रुपयांचे साहित्य जप्त
By admin | Updated: June 8, 2014 00:00 IST