मुंबई : दादर-माटुंगा उड्डाणपुलावर शनिवारी मध्यरात्री स्कॉर्पिओ आणि ट्रकच्या झालेल्या अपघातात ११ जण जखमी झाले. स्कॉर्पिओ गाडीने मित्राचा वाढदिवस साजरा करण्यासाठी मरिन ड्राइव्ह येथे जात असताना हा अपघात झाला. भरधाव वेगात असलेल्या स्कॉर्पिओने दुभाजकाला धडक दिल्यानंतर समोरून येणाऱ्या ट्रकवर ती आदळली. या अपघातात स्कॉर्पिओमध्ये बसलेल्या ९ जणांसह ट्रकचालक आणि क्लिनर जखमी झाले. जखमींवर सायन रुग्णालयात उपचार सुरू आहेत.भांडुपच्या लोकमान्य नगर येथे राहणारे हे ९ तरुण मित्राचा वाढदिवस साजरा करण्यासाठी शनिवारी रात्री १ च्या सुमारास भांडुप येथून मरिन ड्राइव्हकडे निघाले. रात्री २ वाजण्याच्या सुमारास त्यांची गाडी माटुंग्याच्या नानालाल मेहता उड्डाणपुलावर आली. गाडी वेगात असल्याने गाडीचालक पराग शिर्के याचे गाडीवरील नियंत्रण सुटले. त्यामुळे गाडी उड्डाणपुलावरील दुभाजकावर येत सायनच्या दिशेने येणाऱ्या ट्रकवर आदळली. अपघाताच्या आवाजाने गस्तीवर असलेल्या माटुंगा पोलिसांनी घटनास्थळी धाव घेतली. त्यानंतर त्यांनी सर्व जखमींना सायन रुग्णालयात दाखल केले. स्कॉर्पिओ चालकाविरोधात गुन्हा दाखल करण्यात आला आहे. (प्रतिनिधी)
उड्डाणपुलावरील अपघातात ११ जखमी
By admin | Updated: May 1, 2017 04:45 IST