७ सप्टेंबर रोजी येथील व्यापारी निकेश मोतीगीर गिरी यांच्यावर गावातील रणजित दिनकर पात्रे व इंद्रजित दिनकर पात्रे यांनी प्राणघातक हल्ला करून गंभीर जखमी केले. हॉटेल बंद करण्याची वेळ झाली असून मला हॉटेल बंद करावयाचे आहे. त्यामुळे आपण बाहेर जावे, अशी विनंती व्यापारी गिरी यांनी रणजित व इंद्रजित पात्रे यांना केली असता त्यांनी हॉटेलमधून बाहेर जाण्यास नकार देत वाद घातला. त्यात त्यांनी गिरी यांच्या डोक्यात दगडाने जबर मारहाण करुन जखमी केले. दरम्यान, गिरी यांच्या तक्रारीवरून औराद पोलीस ठाण्यात बुधवारी तात्काळ गुन्हा दाखल करुन एका आराेपीस अटक करण्यात आली.
शहरात अशा गावगुंडांचा त्रास छोट्या व गरीब व्यापाऱ्यांना दररोज सहन करावा लागत आहे. त्यामुळे व्यापाऱ्यावरील हल्ल्याच्या व गावगुंडाकडून होणाऱ्या दैनंदिन त्रासाच्या विरोधात शनिवारी निषेध मोर्चा काढून व्यापाऱ्यांनी औराद पोलिसांकडे संरक्षणासाठी निवेदन दिले.
मोर्चास छत्रपती शिवाजी महाराज चौकातून प्रारंभ झाला. मोर्चा ठाण्यावर पोहोचल्यानंतर सहाय्यक पोलीस निरीक्षक संदीप कामत यांना व्यापाऱ्यांच्या वतीने निवेदन देण्यात आले. यावेळी व्यापारी शिवकुमार मंडगे, अर्जुन पाटील, मल्लिकार्जुन लातुरे, बाजार समितीचे सभापती हाजी सराफ, भाजपा तालुकाध्यक्ष शाहुराज थेटे, दिनकर शेटगार, सचिन सोनी, संदीप पाटील, यतिराज झंवर, रमेश थेटे, दीपक थेटे, एकबाल मुल्ला यांच्यासह विविध व्यापारी संघटनांचे प्रतिनिधी व व्यापारी उपस्थित होते.
त्रास देणा-यांची तक्रार करावी...
आरोपींच्या विरोधात तात्काळ गुन्हा दाखल करण्यात आला असून एक आरोपी अटकेत आहे. एक फरार आहे. त्याचाही शोध सुरु आहे. गुन्हेगारावर कठोर कारवाई करण्यात येईल. नागरिकांनी गावगुंडांना न घाबरता पोलिसांकडे तक्रार द्यावी. त्रास देणा-यांवर कठोर कारवाई करण्यात येईल, असे औराद शहाजानीचे सपोनि. संदीप कामत म्हणाले.