शेतकऱ्याच्या दृष्टीने महत्त्वाचा असलेला पोळा सण उत्साहात साजरा झाल्यानंतर रात्री संपूर्ण तालुक्यात पावसाने जोरदार हजेरी लावली. हवामान खात्याने वर्तविलेला अंदाज तंतोतंत खरा ठरत असल्याचे या पावसावरून दिसून आले. सोमवारी रात्रीपासून सुरू झालेला पाऊस दुपारी चार वाजेपर्यंत शहरात व तालुक्यात सर्वच भागात कमी-जास्त प्रमाणात होता. शहरातील अनेक सखल भागात ठिकठिकाणी पाणी साचले होते, तर शहरातील नाल्या तुंबलेल्या दिसून आल्या. त्यामुळे अनेकांच्या घरात पाणी शिरले. ग्रामीण भागातील शेतात ठिकठिकाणी पाणी साचले होते. रात्रभर अधूनमधून पडत असलेल्या या पावसामुळे तालुक्यातील सर्वच नदी-नाल्यांना पाणी आले असून या जोरदार झालेल्या पावसाने ते पाणी खळखळून वाहत आहे. तालुक्यातील तोंडार, नेत्रगाव, देवर्जन भागात मोठा पाऊस झाला आहे. या पावसामुळे तालुक्यातील सर्वच तलावाच्या पाणीपातळी वाढ होण्यास मदत झाली आहे; परंतु सोबतच तोडणीसाठी आलेले उडीद व मुगाच्या शेंगाला आता कोंब फुटू लागले आहेत. हवामान खात्याने वर्तविलेल्या अंदाजाप्रमाणे जर अशा प्रमाणात पाऊस पडत गेला तर सोयाबीनच्या पिकालासुद्धा धोका निर्माण होऊ शकतो, असे शेतकरी सांगत आहेत.
उदगीर तालुक्यात आतापर्यंत मंडळनिहाय पडलेला पाऊस पुढीलप्रमाणे : कंसातील आकडे आतापर्यंत पडलेल्या पावसाची नोंद दर्शवतात. उदगीर २३(८२७), नागलगाव २० (६६२), मोघा २८ ( ८१५), हेर २३(६९२), वाढवणा ११ ( ८०८), नळगीर २० ( ८५२), देवर्जन ५३ (६९६), तोंडार ३० (६८९), मंगळवारी सकाळपर्यंत तालुक्यात सरासरी २६ मि.मी. इतका पाऊस झाला, तर आतापर्यंत एकूण ७५५ मि.मी. एवढा पाऊस पडला आहे.