गेल्या वर्षभरापासून कोरोनाचे संकट आहे. त्यापासून बचाव करण्यासाठी मोठ्या प्रमाणात लसीकरण करण्यात येत आहे. आनंदवाडी गौर ग्रामपंचायतीने गावातील नागरिकांसाठी कोविड लसीकरण करण्यासाठी अथक परिश्रम घेतले असून, पहिल्या टप्प्यामध्ये लसीकरण केंद्रावर जाण्यासाठी ग्रामपंचायतीमार्फत मोफत वाहनाची सुविधा पुरविण्यात आली होती.
मसलगा आरोग्य उपकेंद्राच्या डॉ. अश्विनी शिंदे यांच्यासह आरोग्य कर्मचाऱ्यांमार्फत गावामध्ये लसीकरणासाठी कॅम्प ठेवत दुसऱ्या व तिसऱ्या टप्प्यांमध्ये लसीकरण करण्यावर भर देण्यात आला. अंध, अपंग, अनेक वर्षांपासून आजारी असलेल्यांना लस घेण्यासाठी जाणे शक्य नसल्याने अशांसाठी घरी जाऊन ग्रामपंचायतचे सरपंच, उपसरपंच, सदस्य व आरोग्य विभागाने त्यांच्या घरी जाऊन गावातील शंभर टक्के लसीकरण पूर्ण करण्यासाठी परिश्रम घेतले. वैद्यकीय अधिकारी डॉ. गोपाळ मोरे यांच्या मार्गदर्शनाखाली मसलगा आरोग्य उपकेंद्राच्या डॉ. अश्विनी शिंदे, आरोग्य सेविका यु. एम. कमले, आरोग्य पर्यवेक्षक गणेश कांबळे, सविता जाधव, सचिन शिंदे, आशा कार्यकर्ती मनीषा तंगडपल्ले, अंगणवाडी मदतनीस माया चौरे, सरपंच वर्षा विष्णू चामे, उपसरपंच विमल ज्योतिराम नागमोडे, ग्रामसेविका सदस्य सगुणा, राधिका चामे, वनीता चवरे, शालूबाई चामे, तंटामुक्त समिती अध्यक्ष आयोध्या चामे, माजी सरपंच भाग्यश्री ज्ञानोबा चामे, विष्णू चामे, राम चवरे आदींनी परिश्रम घेतले. गेल्या अनेक वर्षांपासून गावामध्ये माजी सरपंच भाग्यश्री ज्ञानोबा चामे यांनी विविध उपक्रम राबवून गावाचे नावलौकिक केले आहे. तीच परंपरा पुढे आपण सुरू ठेवत गावामध्ये विविध उपक्रम सध्या राबवत असल्याचे सरपंच वर्षा विष्णू चामे यांनी सांगितले.
लसीकरणासाठी इतर गावांनी पुढे यावे...
कोविड आजाराचे सुरक्षा कवच म्हणून कोविड लसीकरण करणे गरजेचे आहे. प्रशासन कुठल्याही मदतीसाठी तत्पर असून तालुक्यातील इतर गावांमध्ये शंभर टक्के लसीकरण पूर्ण करण्यासाठी ग्रामस्थांनी पुढाकार घ्यावा, असे आवाहन गटविकास अधिकारी अमोल ताकभाते यांनी केले आहे.
आरोग्य विभागाला मिळाले सहकार्य...
आनंदवाडी या गावाने १०० टक्के लसीकरण पूर्ण केले असून, यासाठी आरोग्य विभागाला ग्रामस्थ, ग्रामपंचायतचे सहकार्य मिळाले. तालुक्यातील इतरही गावे १७ सप्टेंबरपर्यंत प्राप्त अहवालानुसार जाहीर करण्यात येणार असल्याचे तालुका वैद्यकीय अधिकारी डॉ. प्रदीपकुमार जाधव यांनी सांगितले.