कोरोना काळ असल्यामुळे गतवर्षी सर्व गणेश मंडळांनी अत्यंत साधेपणाने व मंगलमय वातावरणात गणेशोत्सव साजरा करून लातूरची गौरवशाली परंपरा निर्माण केली आहे. यंदाही गत वर्षीप्रमाणेच गणेश उत्सव साजरा करावा, असे आवाहन जिल्हाधिका-यांनी केले आहे. जिल्हाधिकारी कार्यालयाच्या डीपीडीसी सभागृहात सार्वजनिक गणेशोत्सवानिमित्त शांतता समितीची बैठक झाली यावेळी जिल्हाधिकाऱ्यांनी साधेपणाने आणि मंगलमय वातावरणात गणेश उत्सव साजरा करण्याचे ह आवाहन केले. सार्वजनिक ठिकाणी गणेश मंडळ स्थापन करण्याची परवानगी नसल्याने आपापल्या घरांमध्ये, गळ्यामध्ये, मंदिरामध्ये,खाजगी पक्क्या इमारतींच्या ठिकाणी गणेश मूर्तीची स्थापना करावी.गणेश उत्सव साजरा करताना डॉल्बी,डीजेचा वापर करू नये, असे सूचित केले. कायदे भंग केल्यास त्यावर कारवाई करण्यात येईल अशा सूचनाही यावेळी देण्यात आल्या.जिल्ह्यात जवळपास ९२ हजार कोरोना केसेस नोंद झाल्या आहेत. त्यापैकी २४५० रुग्णांचा कोरोनामुळे मृत्यू झाला आहे. कोरोना लसीकरणसारखे आरोग्यविषयक कार्यक्रम राबवून जिल्हा प्रशासन व पोलिस प्रशासनाला सहकार्य करावे, अशाही सूचना करण्यात आल्या. बॅनर, पोस्टरसाठी महानगरपालिकेची पूर्वपरवानगी घ्याण्याची सूचना यावेळी करण्यात आली.
श्री गणेश दर्शनासाठी ऑनलाइनची सोय हवी...
गणेश मंडळांनी महाप्रसादाचे अथवा अन्य गर्दी होईल असे कार्यक्रम आयोजित करू नयेत.भाविकांना श्री गणेश मूर्तीचे दर्शन घेता यावे,यासाठी ऑनलाईन पद्धत करण्याबाबत विचार करावा. स्थापनेच्या ठिकाणी थर्मल स्क्रीनिंग, सनीटायझर आदीची व्यवस्था करावी. श्रीचे आगमन आणि विसर्जन मिरवणूक काढण्यास पूर्णपणे बंदी आहे. तसेच आपल्या भागातील छोट्या मोठ्या गणेश मूर्तींचे विसर्जन एकाच वेळी करण्याची व्यवस्था करण्यात यावी. विसर्जनाच्या ठिकाणी पर्यावरणास अनुरूप नियमांचे पालन करुन श्री गणेश मूर्तीचे विसर्जन करण्यात यावे असेही यावेळी सांगण्यात आले.
७५ डेसीबलपेक्षा जास्त आवाजाची उपकरणे लावण्यास प्रतिबंध....
बैठकीला जिल्हा पोलीस अधीक्षक निखिल पिंगळे, जिल्हा परिषदेचे मुख्य कार्यकारी अधिकारी अभिनव गोयल, अपर पोलीस अधीक्षक हिम्मत जाधव,निवासी उपजिल्हाधिकारी विजयकुमार ढगे, उपविभागीय अधिकारी सुनील यादव, तहसीलदार स्वप्नील पवार, राज्य उत्पादन शुल्कचे उपाधीक्षक गणेश बारगजे, उपविभागीय पोलिस अधिकारी जितेंद्र जगदाळे, पोलीस उपाधीक्षक प्रिया पाटील, मनपा उपायुक्त श्रीमती शिंदेकर, कार्यकारी अभियंता बाबासाहेब थोरात, महावितरणचे कार्यकारी अभियंता समसे,जिल्हा कारागृहाचे चौधरी, पोलीस निरीक्षक पुजारी,तिडके, माकोडे, मिरकले, कदम आदींची उपस्थिती होती. डीजे,डॉल्बी नव्हे तर लाऊड स्पीकरचाही काही वापर करू नये. ७५ डेसीबल पेक्षा जास्त आवाजाचे कोणतेही उपकरण लावण्यास प्रतिबंध आहे असल्याचे जिल्हा पोलीस अधीक्षक निखिल पिंगळे यांनी यावेळी सांगितले.