कोल्हापूर, लातूर संघाला अजिंक्यपद

राज्य बालगट व्हॉलिबॉल अजिंक्यपद स्पर्धा

मुरगूड : बाचणी (ता. कागल) येथे दिशा अकॅडमी व आदर्श क्रीडा मंडळ आयोजित राज्य बालगट व्हॉलिबॉल अजिंक्यपद स्पर्धेत मुलींत कोल्हापूर, तर मुलांत लातूर विभागाने बाजी मारली. अंतिम सामन्याच्या कालावधीमध्ये पावसाच्या व्यत्ययाने मुलींच्या गटात कोल्हापूर व पुणे या दोन्ही संघांची संपूर्ण स्पर्धेतील कामगिरी पाहून अधिक गुणाने कोल्हापूर संघास विजयी घोषित केले. तर मुलांत लातूर व कोल्हापूर या संघांचीही स्पर्धेतील संपूर्ण कामगिरी पाहून गुणाने लातूर संघास विजयी घोषित करण्यात आले. यावेळी अजिंक्य संघास जि. प. अध्यक्षा सौ. विमल पाटील व कोल्हापूरच्या महापौर सौ. वैशाली डकरे यांच्या हस्ते सन्मानित करण्यात आले. या पारितोषिक वितरण समारंभास शिवाजी शिक्षण संस्था कराडचे सचिव प्रकाश पाटील व कोजिमाशिचे सदस्य राजेंद्र रानमाळे, शंकरराव पाटील वरिंगेकर, विजय डांगले, शशिकांत कुलकर्णी, पांडुरंग पाटील (तात्या), शिवाजी डकरे यांच्या प्रमुख उपस्थितीत पार पडला. स्पर्धा यशस्वी करण्यासाठी आदर्श क्रीडा मंडळाचे खेळाडू व सदस्य, मराठा महासंघाचे सर्व सदस्य, गावातील अन्य विविध संस्थांचे पदाधिकारी यांचे सहकार्य लाभले. या स्पर्धेतून निवडलेल्या मुला-मुलींच्या संघाचे राष्ट्रीय स्पर्धा पूर्व प्रशिक्षण शिबिर दिशा अकॅडमी बाचणी येथे दि. ९ आॅक्टोबर ते १२ आॅक्टोबर २०१५ या कालावधीत संपन्न होत आहे. समारंभाचे प्रास्ताविक व्हॉलिबॉल प्रशिक्षक अजित पाटील, तर आभार एम. आर. पाटील विद्यानिकेतन, ज्युनि. कॉलेज प्राचार्या सौ. अरुणा पाटील यांनी मानले.