किनगाव : सोमवारी घराघरात गौरींचे आगमन झाले असून, सोमवार आणि मंगळवार असे दोन दिवस गौरींचा उत्सव साजरा होत आहे. गौरींच्या आगमनानिमित्त केलेल्या आकर्षक रोषणाईने घरातील वातावरण उजळून निघाले असून, किनगाव येथे गौरींच्या सजावटीच्या माध्यमातून आराेग्यविषयक जनजागृतीपर संदेश देण्यात आला आहे.
गौरींचे दोन दिवस नागरिक मनोभावे पूजन करतात तसेच विद्युत रोषणाई करतात. सध्या घराघरात गौरी-गणपतीचे आगमन झाल्याने नागरिक गौरी -गणपतीचा सण साजरा करत आहेत. किनगावात विविध घरांमध्ये गौरी-गणपतीचे थाटात आगमन झाले असून, भाजप तालुका उपाध्यक्ष शिवराज भुसाळे परिवाराकडून गौरींची स्थापना करण्यात आली आहे. यावेळी कोरोना महामारी संदर्भात दैवशाला भुसाळे, प्रियंका भुसाळे, विनिता भुसाळे यांनी आरोग्यविषयक देखावा केला आहे. यात त्यांनी ‘प्रशासनाच्या नियमांचे पालन करूया, आपली व आपल्या कुटुंबाची काळजी घेऊया. लसीकरण करायचे, कोरोनाला हरवायचे, लसीकरणाला जाऊया, कोरोनातून मुक्त होऊया. लसीकरणाला देऊ साथ, कोरोनावर करू मात. लस घ्या सुरक्षित राहा’, असे गौरी -गणपतीच्या माध्यमातून आवाहन केले आहे.
130921\1731-img-20210913-wa0056.jpg
घराघरात गौरी-गणपतीचे थाटात आगमन