लोकमत न्यूज नेटवर्क
उदगीर : नोकरी, व्यवसाय व शिक्षणानिमित्त वेगवेगळ्या देशांमध्ये वास्तव्याला असणारी भारतीय मंडळी दरवर्षी गणेशोत्सव साजरा करतात. जगभरात कार्यरत असणारी मराठी मंडळेही गणेशोत्सवाची परंपरा चालवत आहेत. त्यात तैवान येथील मराठी मंडळही कोरोनामुळे निर्बंध लागू असतानाही गणेशोत्सवाच्या परंपरेत खंड नको म्हणून यंदा ऑनलाईन गणेशोत्सव साजरा करत आहे. त्यामुळे देशाप्रमाणे विदेशातही ऑनलाईन गणेशोत्सवाची मेजवानी भाविकांना मिळत आहे.
तैवान येथे सन २०१५पासून मराठी मंडळ कार्यरत आहे. पुणे, मुंबई, सांगली, सातारा, कोल्हापूर, अहमदनगर, नांदेड, लातूर, उदगीर येथील १००पेक्षा अधिक तरूण-तरूणी शिक्षण, नोकरी व व्यवसायानिमित्त तैवानमधील विविध शहरांत वास्तव्याला आहेत. गणेशोत्सवानिमित्त हे सर्वजण दरवर्षीच एकत्र येऊन गणेशोत्सव साजरा करतात. मात्र, यंदा कोरोना आणि निर्बंधांमुळे प्रत्यक्ष गणेशोत्सव साजरा करणे या मंडळाला शक्य झाले नाही. त्यामुळे या मंडळाने ऑनलाईन गणेशोत्सव सुरू केला आहे. प्रत्यक्ष भेटता आले नसले, तरी या मंडळाचे पदाधिकारी आणि सदस्य ऑनलाईनद्वारे दररोज भेटतात, उत्सवासंदर्भात चर्चा करतात. तैवानमधील उदगीर येथील पंडित आंब्रे, बालाजी बर्वे, संदीप वाघ, संजय मदने, रोहन पाष्टे, पूनम बोराडे, शुभम नवले, अतुल लांजेवार, धैर्यशील चेंडके, स्वप्नील गुजराती, सयाजी मोरे, रेवण कट्टे, कृष्णा बोराडे, बालाजी काळे, रामेश्वर स्वामी, वरद मोडक, महेश गाडेकर आदींनी या ऑनलाईन गणेशोत्सवासाठी पुढाकार घेतला आहे.
निर्बंधांमुळे ऑनलाईन गणेशोत्सव...
कोरोना संसर्गाचा फटका संपूर्ण जगाला बसला आहे. भारताप्रमाणेच तैवान येथेही निर्बंध कायम आहेत. त्यामुळेच सुरक्षेच्या दृष्टीने योग्य खबरदारी घेत यंदाचा गणेशोत्सव ऑनलाईन घेण्याचा निर्णय तैवान येथील मराठी मंडळाने घेतला. त्यानुसार ऑनलाईन उत्सवाला सुरूवात झाली आहे. या उत्सवात विशेष ऑनलाईन व्याख्याने पार पडत आहेत. त्यात ग्रामीण कवी प्रा. इंद्रजित भालेराव, प्रा. राजेश पाटील यांचे व्याख्यान व कविता वाचनाचा कार्यक्रम पार पडला.
संकटकाळी राज्याला मदतीचा हात...
देशापासून दूर असले, तरी सामाजिक बांधिलकी जाेपासण्यात तैवान येथील मराठी मंडळ आघाडीवर आहे. महाराष्ट्रात ज्या-ज्या वेळी संकटे कोसळली, त्यावेळी मदत करून खारीचा वाटा उचलण्याचे काम या मंडळाने केले आहे. सन २०१९ व २०२१मध्ये पूरग्रस्तांना मराठी मंडळाने आर्थिक मदत केली आहे. या मंडळातील सर्व सदस्य महाराष्ट्रीयन असल्याने त्यांना कायम मातृभूमीची ओढ असल्याचे या मंडळाचे सदस्य व उदगीर तालुक्यातील घोनसी येथील रहिवासी पंडित आंब्रे यांनी सांगितले.