भारतीय संस्कृतीत बैलपोळा सणाला अनन्य साधारण महत्त्व आहे. यंदा मृगाच्या प्रारंभी पाऊस झाल्याने वेळेवर पेरण्या झाल्या होत्या. त्यानंतर महिनाभर पावसाने उघडीप दिल्याने शेतक-यांतून चिंता व्यक्त होत होती. परंतु, गेल्या १५ दिवसांपासून सतत पाऊस होत आहे. त्यामुळे शेतक-यांच्या आशा उंचावल्या आहेत. खरीप हंगामातून काहीतरी पदरी पडणार म्हणून शेतक-यांना दिलासा मिळाला आहे. दरम्यान, सोमवारी बैलपोळा सण असल्याने बाजारपेठाही विविध सजावटीच्या साहित्यांनी सजल्या होत्या.
रविवारी खंदमळणी करण्यात आली. सोमवारी सकाळी शेतक-यांनी बैलांना नदी- ओढ्यावर नेऊन स्वच्छ धुतले. त्यानंतर शिंगांना विविध रंग लावले तर बैलांच्या अंगावर रंगाची पावडर टाकली. तसेच पाठीवर झूल टाकून सजावट केली होती. त्यानंतर घरी आणून पूजा केली. हलकी, ढोल- ताश्यांच्या गजरात मिरवणूक काढून मारुतीस प्रदक्षिणा घातली. मारुतीस श्रीफळ अर्पण केल्यानंतर घराच्या दारासमोर आणून शेतक-यांनी सपत्नीक बैलांची पूजा केली. त्यानंतर पुरणपोळीचा नैवेद्य दाखविला.
या सणानिमित्ताने शेतक-यांसह कुटुंबातील मुलांची धावपळ सुरु होती. त्यांच्या चेह-यावर आनंद ओसंडून वाहत होता. बैलाबरोबरच गाय व अन्य पशुधनाची पूजाही करण्यात आली.
मंगलाष्टिका म्हणत टाकल्या अक्षता...
या सणानिमित्ताने शेतक-यांनी बैलांजवळ मंगलाष्टिका म्हणत अक्षता टाकून आरती केली. यावेळी कुटुंबातील अबालवृध्द उपस्थित होते. गेल्या वर्षी हा सण साध्या पध्दतीने साजरा करण्यात आला होता. यंदा श्रावण महिन्यात चांगला पाऊस झाल्याने शेतक-यांच्या चेह-यावर आनंद दिसून येत आहे.