लातूर शहरातील मध्यवर्ती बसस्थानकामध्ये हिरकणी कक्ष आहे. या कक्षाला गेल्या अनेक महिन्यांपासून कुलूप आहे. हा कक्ष कधीच उघडला जात नाही. मातांकडून मागणी होत नसल्याचे कारण दाखवीत हा कक्ष बंदच ठेवण्यात आला आहे. बसस्थानकात आल्यानंतर आपल्या बाळाला स्तनपान करता यावे, यासाठी या कक्षात एक टेबल, एक खुर्ची उपलब्ध करून देण्याची ही योजना होती. मात्र, काही दिवसांतच लातूरच्या बसस्थानकात या योजनेला घरघर लागली असून, कक्ष भांडार झाला आहे.
योजनेच्या सुरुवातीच्या काळात बसस्थानकात ध्वनिक्षेपकावरून या कक्षाबाबत माहितीही दिली जात होती. या योजनेचा फायदा अनेक मातांना झाला; परंतु अचानक कक्ष कुलूपबंद झाल्याने बसस्थानकात बाहेरगावी जाण्यासाठी आलेल्या मातांची बाळाला स्तनपान देण्यासाठी गैरसोय होत आहे. कक्ष पूर्ववत सुरू करण्यात यावा, अशी मागणीही महिला वर्गातून होत आहे.
८ महिन्यांपासून हिरकणी कक्ष बंद
लातूर मध्यवर्ती बसस्थानकातील हिरकणी कक्ष गेल्या आठ महिन्यांपासून बंदच आहे, तर अन्य एका बसस्थानकात हिरकणी कक्षच नाही. मध्यवर्ती बसस्थानकात हिरकणी कक्ष असला तरी तो कायमस्वरूपी कुलूपबंद आहे. तो सुरू करण्यात यावा, अशी मागणी अनेक महिलांनी केली.
हिरकणी कक्ष सुरू
मध्यवर्ती बसस्थानकातील हिरकणी कक्षाला लाॅक लावण्यात आले आहे. माता आपल्या बाळाला स्तनपान करण्यासाठी तेथे आल्यानंतर उघडून दिले जाते. यासाठी महिला कर्मचारी तेथे नियुक्त आहे. हिरकणी कक्षाची सेवा सुरूच आहे. बंद केलेली नाही.
-जाफर कुरेशी,
आगार प्रमुख, लातूर