प्रभुराज प्रतिष्ठानच्या वतीने जीवनावश्यक वस्तूंचे वाटप
लातूर : महाराष्ट्र दिनानिमित्त शहरातील प्रभुराज प्रतिष्ठानच्या वतीने गरजूंना जीवनावश्यक वस्तूंचे वाटप करण्यात आले, तसेच शहरातील विविध कोविड केअर सेंटरच्या बाहेर रुग्णांच्या नातेवाइकांना मोफत भोजन देण्यात आले, तसेच बेघर, निराधारांनाही भोजन देऊन मायेचा घास भरविला. यावेळी प्रतिष्ठानचे अध्यक्ष ॲड.अजय कलशेट्टी, विष्णू गुरुडे, गोपाळ खंडागळे, मयूर साबणे, सचिन भोसले, सागर चांडसुरे, महादू रासे, रवि घुगरे, सौरभ कलशेट्टी, साईनाथ रासे, राम डुमणे आदींनी परिश्रम घेतले.
लातूर शहर महापालिकेत अभिवादन कार्यक्रम
लातूर : राष्ट्रसंत तुकडोजी महाराज यांच्या जयंतीनिमित्त लातूर शहर महापालिकेत अभिवादन करण्यात आले. याप्रसंगी मनपा आयुक्त अमन मित्तल यांच्या हस्ते राष्ट्रसंत तुकडोजी महाराज यांच्या प्रतिमेस पुष्पहार अर्पण करून अभिवादन करण्यात आले. यावेळी मनपा उपायुक्त मयुरा शिंदेकर, आस्थापना प्रमुख रमाकांत पिडगे, लाला जाधव, सविता निरगुडे आदींसह महानगरपालिकेतील कर्मचाऱ्यांची उपस्थिती होती.
खोपेगाव येथे कोविड आढावा बैठक
लातूर : तालुक्यातील खोपेगाव येथील ग्रामपंचायतीत कोरोना उपाययोजना आढावा बैठक घेण्यात आली. यावेळी आरोग्यविषयक माहिती घेऊन उपाययोजना राबविण्याबाबत निर्णय घेण्यात आले. याप्रसंगी मंडळ अधिकारी संजय घाडगे, तलाठी साईनाथ सूर्यवंशी, ग्रामसेवक बालाजी दुधाटे, आरोग्याधिकारी जाधव, उपसरपंच लक्ष्मण पवार, पोलीस पाटील दिनकर सूर्यवंशी, रवि मोरे, दामोदर शिंदे, अमोल घायाळ आदींसह ग्रा.पं. सदस्य, आरोग्य कर्मचाऱ्यांची उपस्थिती होती.