आरोग्य विभागाच्यावतीने प्रत्येक गुरुवारी जळकोट शहर व तालुक्यात विशेष मोहीम राबविण्यात येत असून, लसीकरण संदर्भात जनजागृती केली जात आहे. नागरिकांचे आरोग्य लक्षात घेता राज्यमंत्री संजय बनसोडे व आरोग्य उपसंचालक डॉ. एकनाथ माले यांनी जळकोट तालुक्यात लसीकरण आढावा बैठक घेत लसीकरण मोहीम प्रभावीपणे राबविण्याच्या सूचना केल्या होत्या. त्यानुसार आरोग्य विभागाची टीम तालुक्यातील ४७ गावात कार्यान्वित झाली आहे. जळकोट तालुक्यात २४ हजार ९६० जणांनी पहिला डोस घेतला असून, ८ हजार २०२ नागरिकांनी दुसरा डोस घेतला आहे. एकूण ३३ हजार १६२ नागरिकांचे लसीकरण झाले आहे. वांजरवाडा प्राथमिक आरोग्य केंद्र, आतनूर प्राथमिक आरोग्य केंद्र, ग्रामीण रुग्णालय जळकोट पीएससी अंतर्गत लसीकरण झाले आहे. यासाठी ग्रामीण रुग्णालय जळकोटचे डॉ. जगदीश सूर्यवंशी, तालुका वैद्यकीय अधिकारी डॉ. संजय पवार डॉ. फारुख मनियार, डॉ. भारती, डॉ. भातलवंडे, डॉ. सचिन सिद्धेश्वरे, डॉ. शीतल काळे, श्रीकांत सोपा, डॉ. महादेव डांगे, डॉ. बिरादार, डॉ. तांबोळी आदींसह आरोग्य कर्मचारी लसीकरणाच्या यशस्वीतेसाठी परिश्रम घेत आहेत.
लसीकरण जनजागृती मोहिमेवर भर...
कोरोनाचा प्रादुर्भाव कमी झाला असला तरी मास्क, फिजिकल डिस्टन्स, सॅनिटायझर आदी नियमांचे काटेकार पालन करण्याच्या सूचना प्रशासनाच्यावतीने नागरिकांना देण्यात आल्या आहेत. तसेच जळकोट शहरासह ग्रामीण भागात आरोग्य विभाग, तहसीलदार, गटविकास अधिकारी, शहरातील नगरसेवक, ग्रामसेवक, तलाठी, पोलीस निरीक्षक लसीकरण जनजागृती मोहिमेसाठी पुढाकार घेत आहेत. त्यामुळे लसीकरणाला जळकोट तालुक्यात चांगला प्रतिसाद मिळत असल्याचे चित्र आहे.