रविवार (दि. ६) रात्री ११ च्या दरम्यान आमतेवाडीहून गावाकडे येताना सातवे-बच्चे सावर्डे रस्त्यावर मोरया गॅरेजसमोर रस्त्यावरच्या खडीमुळे मोटारसायकल घसरून पडली. रस्त्यावरील खडीवर डोके आपटल्यामुळे डोक्याला जबर दुखापत होऊन सुनील जागीच ठार झाला. अपघातात मोटारसायकलच्या पुढच्या भागाचा पूर्ण चक्काचूर झाला आहे.
सुनीलच्या वडिलांचे निधन झाले असून, घरात तो एकुलता कर्ता पुरुष होता. त्याचे छोटे हार्डवेअरचे दुकान असून त्यावरच कुटुंबाचा उदरनिर्वाह चालत होता. त्याचे नुकतेच लग्न झाले असून त्याची अजून हळद सुकण्यापूर्वी घरापासून हाकेच्या अंतरावर त्याचा मृत्यू झाल्याने सातवेसह परिसरात हळहळ व्यक्त होत आहे. मृत्यूचे वृत्त समजताच त्याच्या कुटुंबीयांनी हृदय पिळवटून टाकणारा आक्रोश केला. सोमवारी सकाळी त्याच्या मृतदेहावर अंत्यसंस्कार करण्यात आले. सुनीलच्या पश्चात दोन विवाहित बहिणी, आई व पत्नी आहेत. कोडोली पोलीस ठाण्यामध्ये या घटनेची नोंद झाली असून, सपोनि सूरज बनसोडे यांच्या मार्गदर्शनाखाली पुढील तपास सुरू आहे.
रस्त्यावरील खडीने केला घात!
रस्त्यावरील खडी वाहनांच्या वर्दळीमुळे संपूर्ण रस्त्यावर विखरून पडली आहे. वर्षभरापासून पडलेल्या या खडीमुळे वारंवार दुचाकी वाहने स्लीप होण्याच्या घटना घडत असून या खडीने सुनीलचा घात झाल्याचे प्रत्यक्षदर्शीकडून बोलले जात होते.
फोटो: मृत सुनील पाटील(सातवे).