सेनापती कापशी : येथील मेहता डेअरीजच्या चिलिंग सेंटरनजीक दोन दुचाकीस्वारांची समोरासमोर धडक होऊन झालेल्या अपघातात एक ठार तर तिघेजण गंभीर जखमी झाले. या अपघात अक्षय प्रकाश पाटील (वय २७, रा. हसूर खुर्द, ता. कागल) हा तरुण ठार झाला तर अमित हंचनाळे (रा. ठाणेवाडी), संजय केशव पाटील व पांडुरंग दशरथ पाटील (दोघेही रा. बेलेवाडी काळम्मा) हे तिघे गंभीर जखमी झाले. रात्री साडेनऊच्या सुमारास ही घटना घडली.
पोलीस ठाणे व घटनास्थळावरून मिळालेली माहिती अशी, संजय पाटील व पांडुरंग पाटील हे हमीदवाडा कारखान्याचे कर्मचारी कामावरून घरी येत होते तर अक्षय पाटील व अमित हंचनाळे हे कामानिमित्त नंद्याळकडे चालले होते. नंद्याळ कापशी रस्त्यावर मेहता डेअरीच्या चिलिंग सेंटरजवळ धोकादायक वळण आहे. याठिकाणी दुचाकीस्वारांची समोरासमोर जोरदार धडक झाली. यामध्ये अक्षय पाटील हा जागीच ठार झाला. जखमीवर गडहिंग्लज येथे उपचारासाठी दाखल करण्यात आले.
अक्षयने एम.एस.सी पर्यंत शिक्षण पूर्ण केले होते. येत्या काही दिवसांतच तो कंपनीत हजर होणार होता. त्यापूर्वीच काळाने त्याच्यावर घाला घातला. या घटनेची नोंद पोलीस ठाण्यात झाली असून पोलीस पुढील तपास करत आहेत.
फोटो. अक्षय पाटील