याबाबत घटनास्थळ व पोलीस ठाण्यातून मिळालेली माहिती अशी, रोहितचे बारावीपर्यंत शिक्षण झाले होते. त्याला पोहायला येत नसल्याने अलीकडे तीन ते चार दिवसांपासून तो पोहायला शिकण्यासाठी जात होता.
आज दुपारी बाराच्या सुमारास तमनाकवाडा-हणबरवाडी रोडवरील दत्त मंदिर मठाजवळील विहिरीत तो पोहायला शिकण्यासाठी गेला. विहिरीत उतरत असतानाच त्याचा पाय घसरला व तो थेट विहिरीत पडला. तो वर आला नाही. त्यामुळे पोहायला आलेले तरुण घाबरले. विशाल काळगे व इतर तरुणांनी समयसूचकता दाखवत धाडसाने विहिरीत उड्या मारून बुडालेल्या रोहितला पाण्यातून बाहेर काढले व तातडीने कापशी प्राथमिक आरोग्य केंद्रात दाखल केले. पण त्यापूर्वी च रोहितचा मृत्यू झाला होता. त्याच्या पश्चात आई-वडील, भाऊ व बहीण असा परिवार आहे.
अतिशय मनमिळाऊ स्वभावाच्या रोहितचा अचानक मृत्यू झाल्याने त्याच्या मित्रांना मोठा धक्का बसला. कापशी प्राथमिक आरोग्य केंद्राच्या आवारात मित्रांनी मोठी गर्दी केली होती.