कोल्हापूर : भरधाव वेगाने धावणारी दुचाकी घसरून झालेल्या अपघातात तरुणाचा मृत्यू झाला तर चालक जखमी झाल्याची घटना वरणगे पाडळी (ता. करवीर) येथील सूर्यदत्ता कॉलनी समोर रविवारी घडली. शुभम रामचंद्र स्वामी (वय २३ रा. जठारवाडी, ता. करवीर) असे मृत्यू झालेल्याचे नाव आहे तर चालक स्नेहांकित नंदकुमार खाडे (वय २१ राज जठारवाडी) हे जखमी झाले.
जठारवाडी येथील स्नेहांकित व शुभम हे दोघे मित्र दुचाकीवरून वरणगे पाडळीकडे जात होते, भरधाव दुचाकी रस्त्यावर घसरून दोघेही खाली पडले. त्यामध्ये तोंडाला आणि डोक्याला गंभीर दुखापत झाल्याने शुभमचा उपचाराअंती मृत्यू झाला. तर स्नेहांकित गंभीर जखमी झाला. त्याच्यावर सेवा रुग्णालयात उपचार केले. दुचाकी हयगयीने व निष्काळजीपणे चालवून दुर्घटना केल्याप्रकरणी जखमी स्नेहांकित खाडे याच्यावर मंगळवारी रात्री उशीरा करवीर पोलीस ठाण्यात गुन्हा नोंदवला आहे.