कोल्हापूर : आशियायी आंतरराष्ट्रीय महिला रग्बी स्पर्धेत दुसरा क्रमांक मिळवल्याबद्दल पाडळी खुर्द (ता. करवीर) येथील वैष्णवी दत्तात्रय पाटील हिचे शुक्रवारी सायंकाळी ताराराणी पुतळ्याजवळ आगमन होताच जल्लोषी स्वागत करण्यात आले. फटाक्यांची आतषबाजी करण्यात आली. गंगावेश रिक्षा मित्रमंडळाचे अध्यक्ष दत्तात्रय पाटील हे तिचे वडील आहेत. यामुळे रिक्षा मित्रमंडळातर्फे शहरातून रिक्षाची मिरवणूक काढून तिचा गौरव करण्यात आला. मिरवणुकीत उघड्या टपाच्या जीपमध्ये ती उभी होती.
१८ वर्षांखालील महिलांच्या आशियाई रग्बी स्पर्धा १८ आणि १९ सप्टेंबरला ताश्कंद उझबेकिस्तान येथे झाल्या. या स्पर्धेत सहभागी भारतीय संघात वैष्णवी पाटील हिने उत्कृष्ट खेळाचे प्रदर्शन केले. त्यानंतर तिचे पुण्याहून सायंकाळी कोल्हापूरला आगमन झाले. आगमन होताच ग्रामस्थ आणि गंगावेश रिक्षा मित्रमंडळाच्या पदाधिकाऱ्यांनी तिचे मोठ्या उत्साहात स्वागत केले. हलगी, कैचाळाच्या निनादात लक्ष वेधण्यात आले. ताराराणी यांच्या पुतळ्याला पुष्पहार अर्पळ करून मिरवणूक मार्गस्थ झाली. पाडळी खुर्द येथे वैष्णवी हिच्या घरी मिरवणुकीची सांगता झाली. मिरवणुकीत सरपंच तानाजी पालकर, प्रकाश पाटील, दीपक पोवार, सागर पालकर, गणेश रावळ, सुवर्णा पाटील, माधुरी पाटील, कांचन पाटील, मंगला पाटील आदी उपस्थित होते.
कोट
ग्रामीण भागातून येऊनही आंतरराष्ट्रीय रग्बी स्पर्धेत यश मिळवले. यामुळे आत्मविश्वास वाढला आहे. यापुढील विविध स्पर्धांतही चांगली कामगिरी करण्याचा प्रयत्न असेल.
वैष्णवी पाटील
फोटो : २४०९२०२१-कोल- पाटील मिरवणूक व पाटील मिरवणूक ०१
कोल्हापुरातील ताराराणी चौकात शुक्रवारी वैष्णवी पाटील हिचा ग्रामस्थ आणि गंगावेश रिक्षा मित्रमंडळाच्या पदाधिकाऱ्यांनी जल्लोष स्वागत करून शहरातून मिरवणूक काढली. दुसऱ्या छायाचित्रात मिरवणुकीत रिक्षा चालकांनी हलगीच्या निनादात नृत्य केेले.
छाया : नसीर अत्तार