कोल्हापूर : कोरोना रुग्णांसाठी खासगी रुग्णालयातील बेड उपलब्ध करून देणे, कोरोना उपाययोजनांसाठी स्थापन करण्यात आलेल्या समिती व अधिकाऱ्यांशी समन्वय साधणे तसेच रुग्णांना सोयी-सुविधा पुरवण्यासाठी २४ तास संपर्कात राहून माहिती देण्यासाठी वॉर रूम सुरू करण्यात आल्याची माहिती जिल्हाधिकारी दौलत देसाई यांनी सोमवारी दिली. या वॉर रूमसाठी व खासगी रुग्णालयांसाठी अधिकारी व कर्मचाऱ्यांची देखील नियुक्ती करण्यात आली आहे.
जिल्ह्यात कोरोना संसर्ग वाढला असून शासकीय व खासगी रुग्णालयातील बेड, कोविड काळजी केंद्र, कोविड समर्पित केंद्र यांच्याकडील शहरातील ऑक्सिजन व नॉन ऑक्सिजन बेडच्या व्यवस्थापनासाठी समन्वय अधिकाऱ्यांची नियुक्ती करण्यात आली आहे. वरील सर्व रुग्णालये व काळजी केंद्रांशी समन्वय साधून त्यांच्याकडील उपलब्ध बेडची माहिती घेणे, नागरिक, रुग्ण व नातेवाईकांना या उपलब्ध बेडची माहिती मिळावी यासाठी माहिती देवाणघेवाणीची जबाबदारी त्यांच्यावर सोपवण्यात आली आहे. त्यासाठी जिल्हाधिकारी कार्यालयात वॉर रूम सुरू करण्यात आली आहे व प्रत्येक अधिकारी कर्मचाऱ्यांकडे शासकीय-खासगी रुग्णालये, तसेच कोविड काळजी केंद्रे सोपवण्यात आली आहेत.
--
नियंत्रण कक्षातील संपर्क क्रमांक
०२३१-२६५९२३२, २६५२९५०,२६५२९५३, २६५२९५४ टोल फ्री : १०७७
व्हॉटस अप नंबर : ९३५६७१६५६३, ९३५६७३२७२८,९३५६७१३३३०,८२७५१२१०७७.
---