लोकमत न्यूज नेटवर्क
कोल्हापूर : मराठा समाजाला घटनात्मकरीत्या टिकणारे आरक्षण राज्य आणि केंद्र शासनाने द्यावे. हे आरक्षण मिळेपर्यंत ओबीसी प्रवर्गाप्रमाणे मराठा समाजाला नोकरी, शिक्षणामध्ये सुविधा द्याव्यात. त्याबाबतचा निर्णय राज्य सरकारने त्वरित एक-दोन दिवसांमध्ये घ्यावा. कोरोनामुळे सध्या आरक्षण आणि विविध मागण्यांसाठी आम्ही शांततेने पाठपुरावा करणार आहोत. त्याबाबतची आचारसंहिता निश्चित केली असून, त्यानुसार पुन्हा लढा दिला जाणार असल्याचे कोल्हापुरातील सकल मराठा समाजाचे समन्वयक वसंतराव मुळीक, दिलीप देसाई, इंद्रजित सावंत यांनी बुधवारी येथे पत्रकार परिषदेत सांगितले.
मराठा समाजाला आता घटनात्मक आरक्षण मिळावे, ही आमची प्रमुख मागणी आहे. ती पूर्ण करण्यासाठी राज्य सरकारने केंद्र सरकारकडे पाठपुरावा करावा. केंद्र सरकारने प्रसंगी घटनेत बदल करावा. आरक्षण रद्द झाल्याने मराठा समाजातून तीव्र प्रतिक्रिया व्यक्त होत आहेत. सरकारने मागण्यांच्या मान्यतेबाबत लवकर सकारात्मक कार्यवाही करावी, अशी मागणी वसंतराव मुळीक यांनी केली. घटनात्मक आरक्षणासाठी राज्य सरकारने कॅॅबिनेटचा ठराव करून तो केंद्र सरकारकडे पाठवावा. त्याबाबत सकल मराठा समाज पाठपुरावा करेल. त्यादृष्टीने आरक्षणासाठीच्या राज्यभरातील लढ्याचा केंद्रबिंदू कोल्हापूर राहणार आहे. या लढ्याची आचारसंहिता निश्चित केली असल्याचे दिलीप देसाई यांनी सांगितले. आरक्षण मिळालेच पाहिजे, ते मिळेपर्यंत ओबीसी प्रवर्गाप्रमाणे मराठा समाजाला राज्य सरकारने सुविधा द्याव्यात. सारथी संस्था सक्षमीकरण, अण्णासाहेब पाटील आर्थिक विकास महामंडळाकडून कर्जपुरवठा आदी मागण्यांची पूर्तता करणे सरकारच्या हातात असून, त्याबाबत त्वरित निर्णय घ्यावा. आरक्षणासह विविध मागण्यांसाठीचा लढा सकल मराठा समाजाने बुधवारपासून शांततेच्या मार्गाने पुन्हा सुरू केला असल्याचे इंद्रजित सावंत यांनी सांगितले. यावेळी गुलाबराव घोरपडे, दिलीप सावंत, हर्षेल सुर्वे, शशिकांत पाटील, उत्तम जाधव, अवधूत पाटील उपस्थित होते.
--------------------------------------
अन्य मागण्या अशा
-सारथी संस्थेच्या विस्तारीकरणासह तिचे सक्षमीकरण करावे.
-अण्णासाहेब पाटील आर्थिक विकास महामंडळाच्या कर्जवितरणामध्ये सुलभता आणावी.
-मराठा समाजातील विद्यार्थ्यांची शैक्षणिक शुल्क रचना ‘ओबीसी’ समाजाच्या विद्यार्थ्यांप्रमाणे करावी.
-मराठा आरक्षणातून ज्यांची सरकारी नोकरीमध्ये निवड झाली आहे त्यांना ताबडतोब रुजू करण्यात यावे.
-----------------------------
मराठा आरक्षणाच्या लढ्याला शाहू छत्रपतींचे पाठबळ
मराठा आरक्षणासाठी दिल्लीपर्यंत लढा द्यावा लागणार आहे, त्यासाठी मी तुमच्यासोबत आहे. माझे सर्वतोपरी पाठबळ राहील, असे शाहू छत्रपतींनी सांगितले असल्याची माहिती इंद्रजित सावंत यांनी दिली.