नृसिंहवाडीत दत्त जयंतीचा अपूर्व सोहळा

‘दिगंबराऽ. . . दिगंबराऽऽ’...चा गजर : राज्याच्या कानाकोपऱ्यातून भाविकांची मोठी हजेरी

नृसिंहवाडी : श्री दत्त जयंतीनिमित्त अखंड दत्तनामाने श्री क्षेत्र नृसिंहवाडी दुमदुमली. ‘दिगंबराऽ. . . दिगंबराऽऽ’...च्या व ‘श्री गुरुदेव दत्तऽ...’च्या गजरात कृष्णा-पंचगंगा संगमतीर्थावर भक्तिमय वातावरणात श्री दत्त महाराजांच्या राजधानीत आज, शुक्रवारी सायंकाळी पाच वाजता श्री दत्त जन्मकाळ सोहळा हजारो भाविकांच्या उपस्थितीत उत्साहात पार पडला.श्री क्षेत्र नृसिंहवाडी येथे आज, दत्त जयंतीनिमित्त श्री दत्त मंदिरात अनेक धार्मिक कार्यक्रम पार पडले. पहाटे चार वाजता काकड आरती व शोडषोपचार पूजा, सकाळी सात ते बारा या वेळेत अनेक भक्तांनी श्रींचा पंचामृत अभिषेक घालून पूजा केली. दुपारी साडेबाराला श्रींचे चरणकमलावर महापूजा झाली. महापूजेनंतर भाविकांना महाप्रसादाचे वाटप करण्यात आले. तीन वाजता येथील ब्रह्मवृंदाच्यावतीने पवमान पंचसुक्तांचे पठण करण्यात आले. साडेचार वाजता श्रींची उत्सवमूर्ती श्री नारायणस्वामी मंदिरातून वाजत-गाजत मुख्य मंदिरात आणण्यात आली. पाच वाजता धार्मिक वातावरणात असंख्य भाविक व ब्रह्मवृंदांच्या उपस्थितीत विधिवत दत्त जन्मकाळ सोहळा पार पडला. जन्मकाळासाठी चांदीचा पाळणा विविध रंगांच्या फुलांनी सजविण्यात आला होता. भक्तांनी पाळण्यावर अबीर, गुलाल व फुलांची मुक्त हस्ते उधळण केली. जन्मकाळानंतर येथील दत्त मंदिरात पारंपरिक पाळणा गीते व आरत्या म्हणण्यात आल्या व प्रार्थना करण्यात आली. रात्री दहानंतर दत्त मंदिरात धूप, दीप, आरती व पालखी सोहळा पार पडला. जन्मकाळ सोहळ्यासाठी महाराष्ट्रासह गुजरात, कर्नाटक, गोवा, आदी राज्यांतून अनेक भक्तगण आले होते. कर्नाटकातील बोरगाव, उगार तसेच सांगली, मिरज, इचलकरंजी, कोल्हापूर, आदी भागांतून हजारो भक्त व महिला पहाटेच्या थंडीतही चालत आले होते. दरम्यान, भाविकांच्या सोयीसाठी येथील दत्त देव संस्थान व ग्रामपंचायतीच्यावतीने नेटके संयोजन करण्यात आले होते. नेटके संयोजनदत्त दर्शनासाठी आलेल्या भाविकांना व्यवस्थितरीत्या दत्त दर्शन झाल्याने दत्त देव संस्थानचे विश्वस्थ, ग्रामपंचायत सदस्य, पोलीस खाते, स्वयंसेवक, कर्मचारी, आदींच्या सहकार्याने श्री दत्त जयंती सोहळा उत्तमरीत्या पार पडल्याचा विश्वास देवस्थानचे अध्यक्ष संजय पुजारी, सचिव सोमनाथ पुजारी, सरपंच राजश्री कांबळे व उपसरपंच अरुंधती पुजारी यांनी व्यक्त केला.जोतिबावर दत्त जयंती जोतिबा : श्री क्षेत्र जोतिबा डोंगरावर आज, शुक्रवारी श्री दत्त जन्मकाळ सोहळा उत्साहात साजरा करण्यात आला. पुण्याहवाचन, होमशांती, महापूजा, भजन, आदी कार्यक्रम झाले. श्री जोतिबा मंदिर परिसरात असणाऱ्या श्री दत्त मंदिरात आज सकाळी श्री दत्त मूर्तीस रुद्राभिषेक घालण्यात आला.