पोर्ले तर्फ ठाणे : कोल्हापूर-रत्नागिरी मार्गावरील रजपूतवाडी गावाजवळ टायर फुटलेल्या टेम्पोचा ताबा सुटून समोरून येणाऱ्या ट्रकला धडकल्याने टेम्पो चालकासह ट्रक चालक जखमी झाला. केवळ दैव बलवत्तर म्हणून टेम्पो चालक बळवंत यशवंत चेचर (वय ५०, रा. पोर्ले तर्फ ठाणे, ता. पन्हाळा) आणि ट्रक चालक पद्माकर काशीनाथ काजवे (रा. हासूर-दुमाला, ता. करवीर) अशी बचावलेल्या चालकांची नावे आहेत. अपघातात दोन्ही वाहनांच्या दर्शनी भागाचा चक्काचूर झाल्याने वाहनांचे नुकसान झाले आहे. संबंधित घटनेची सीपीआर चौकीत नोंद करण्यात आली आहे.
घटनास्थळावरून मिळलेली माहिती, पहाटे पन्हाळा तालुक्यातील उत्रे येथून टेम्पोत गूळ भरून बळवंत चेचर शाहू मार्केटकडे निघाले होते. त्यांचा टेम्पो कोल्हापूर-रत्नागिरी मार्गावरील रजपूतवाडी गावाजवळ आला असता भरधाव टेम्पोचा अचानक टायर फुटला. त्यामुळे चालकाचा टेम्पोवरील ताबा सुटल्याने, कोल्हापूरहून मलकापूरकडे जाणाऱ्या विरोध दिशेने येणाऱ्या ट्रकवर टेम्पो जोरात जाऊन धडकला. अपघातात दोन्ही वाहनांच्या दर्शनी भागांचा अक्षरश: चक्काचूर झाला आहे. अपघाताची भीषणता ऐवढी होती की, सुदैवाने ट्रक चालक पद्माकर काजवे आणि टेम्पो चालक बळवंत चेचर हे दोघेही चालक जखमी झाले. त्यांना तातडीने उपचारासाठी दवाखान्यात नेण्यात आले. गुळाने भरलेले बाॅक्स अपघातामुळे रस्त्यावर विसकटलेल्या अवस्थेत होते. अपघातानंतर महामार्गावर काही काळ वाहतुकीची कोंडी झाली होती. पोलिसांनी काही वेळानंतर वाहतूक सुरळीत केली.