कोल्हापूर : स्कार्पीओ गाडीला महापालिकेचा डंपर घासल्याचे निमित्त पुढे करत अनोळखी पाच जणांनी डंपरचालक व वाहकाला जबरदस्तीने गाडीत घालून टोप संभापूर (ता. हातकणंगले) येथे नेऊन त्यांना दगडाने व लाथाबुक्क्यांनी बेदम मारहाण केली. हल्ल्यात डंपरचालक तात्यासाहेब यशवंत लोंढे (वय ४९ रा. भोई गल्ली, सी वॉर्ड, लक्ष्मीपुरी, कोल्हापूर), सुनील रघुनाथ जगदाळे (रा. लक्ष्मीपुरी) हे दोघे महापालिकेचे कामगार जखमी झाले. ही घटना मंगळवारी दुपारी कसबा बावडा संकपाळ नगरात घडली. याप्रकरणी शाहूपुरी पोलीस ठाण्यात स्कार्पीओतील अनोळखी पाच जणांवर गुन्हा दाखल झाला.
पोलिसांनी दिलेली माहिती अशी की, मंगळवारी दुपारी महापालिकेचा डंपर कसबा बावडाकडे जात होता, त्यावेळी संकपाळ नगर परिसरात एक स्कार्पीओ गाडी ओव्हरटेक करण्याच्या प्रयत्नात डंपरला घासली. संतप्त स्कार्पीओचालकाने गाडी पुढे नेऊन डंपरच्या आडवी थांबवली. गाडीतील पाच जणांनी उतरुन डंपरचालक लोंढे व जगदाळे या दोघांना शिवीगाळ करून जबरदस्तीने स्कार्पीओ गाडीत बसवले. ती भगवा चौकातून न्यायालयपर्यंत गेली, त्यानंतर पुन्हा स्कार्पीओ गाडी वळवून कसबा बावडा, शिये टोल नाकामार्गे क्रशर चौक, टोप संभापूर येथे नेले. तेथे दोघा कामगारांना दमदाटी करून लाथाबुक्क्यांनी मारहाण केली. गाडीतील जगदाळे यांना स्कार्पीओ गाडीतून रस्त्याकडेला खाली ढकलून त्यांना दगडाने मारहाण केली. यामध्ये तोंडावर, पाठीत, डोक्यात दगड लागल्याने ते गंभीर जखमी झाले. त्यानंतर लोंढे यांनाही मारहाण केली.
घटनेनंतर भेदरलेल्या दोघांनी मित्रांना फोन करून बोलवून घेतले. याबाबत तात्यासाहेब लोंढे यांनी शाहूपुरी पोलीस ठाण्यात दिलेल्या तक्रारीवरून अनोळखी पाच जणांवर गुन्हा नोंदविला आहे. त्या पाच जणांचा पोलीस शोध घेत आहेत. पुढील तपास सहा. पो. नि. सागर पाटील व पोलीस उपनिरीक्षक राहुल वाघमारे करीत आहेत.
पळून जाणाऱ्याचा केला पाठलाग, लुटले
सहकारी जगदाळे यांना मारहाण करत असल्याचे पाहून तात्यासाहेब लोंढे हे पळून जात होते. त्यांचा पाठलाग करून त्यांना जबरदस्तीने पकडून पुन्हा स्कार्पीओ गाडीत बसवले. पुढे नेऊन त्यांना पुन्हा लाथाबुक्क्यांनी मारहाण करून मोबाइल संच, खिशातील १२०० रुपये असा सुमारे ३३०० रुपयांचा मुद्देमाल जबरदस्तीने काढून घेतला. त्यानंतर त्यांना गाडीतून खाली ढकलून भरधाव वेगाने पुढे निघून गेले.